មនុស្សរាប់សែននាក់ បានប្រមូលផ្តុំគ្នា នៅក្នុងទីក្រុង និងទីប្រជុំជននានា ទូទាំងប្រទេសក្រិក នៅថ្ងៃសុក្រ (ទី២៨ ខែកុម្ភៈ) នេះ ដើម្បីទាមទាររកយុត្តិធម៌ នៅខួបលើកទី២ នៃឧបទ្ទវហេតុរថភ្លើងដែលបណ្ដាលឲ្យមានមនុស្សស្លាប់ច្រើនបំផុតមិនធ្លាប់មានរបស់ប្រទេស ខណៈដែលកូដកម្មរបស់បុគ្គលិក បានធ្វើឲ្យជើងហោះហើរត្រូវបានផ្អាក ឬពន្យារពេល និងបានបញ្ឈប់ការដឹកជញ្ជូន តាមផ្លូវទឹក និងផ្លូវដែក។

គួររំលឹកថា មនុស្ស ៥៧នាក់ បានបាត់បង់ជីវិត នៅពេលដែលរថភ្លើងដឹកអ្នកដំណើរពេញផ្ទុកទៅដោយនិស្សិត បានបុកជាមួយរថភ្លើងដឹកទំនិញ កាលពីថ្ងៃទី២៨ ខែកុម្ភៈ ឆ្នាំ២០២៣ នៅជិតជ្រលងភ្នំ Tempi នៅកណ្តាលប្រទេសក្រិក។

កាលពីថ្ងៃព្រហស្បតិ៍ (ទី២៧ ខែកុម្ភៈ) ការស៊ើបអង្កេតមួយ បានរកឃើញថា ២ឆ្នាំក្រោយមក គម្លាតសុវត្ថិភាពដែលបណ្តាលឲ្យមានគ្រោះថ្នាក់នោះមិនត្រូវបានបំពេញនៅឡើយទេ។ ការស៊ើបអង្កេតរបស់តុលាការដាច់ដោយឡែក នៅតែមិនទាន់បញ្ចប់ ហើយគ្មាននរណាម្នាក់ត្រូវបានកាត់ទោស សម្រាប់ឧបទ្ទវហេតុនេះទេ។

គួរបញ្ជាក់ថា មហាបាតុកម្ម ត្រូវបានគ្រោងធ្វើនៅក្នុងទីក្រុងរាប់សិបទូទាំងប្រទេស។ រាល់ជើងហោះហើរក្នុងស្រុក និងអន្តរជាតិទាំងអស់ ត្រូវបានផ្អាក ខណៈដែលអ្នកត្រួតពិនិត្យចរាចរណ៍ផ្លូវអាកាស បានចូលរួមជាមួយអ្នកដើរតាមសមុទ្រ អ្នកបើកបររថភ្លើង វេជ្ជបណ្ឌិត មេធាវី និងគ្រូបង្រៀន នៅក្នុងកូដកម្មទូទៅរយៈពេល ២៤ម៉ោង ដើម្បីឧទ្ទិសដល់ជនរងគ្រោះ ក្នុងឧប្បត្តិហេតុរថភ្លើងនោះ។

រដ្ឋាភិបាលកណ្តាល-ស្តាំនិយមរបស់លោកនាយករដ្ឋមន្ត្រី Kyriakos Mitsotakis ដែលបានជាប់ឆ្នោតឡើងវិញ បន្ទាប់ពីមានហេតុការណ៍នៅឆ្នាំ២០២៣ បានប្រឈមនឹងការរិះគន់ម្តងហើយម្តងទៀតពីសាច់ញាតិជនរងគ្រោះ ចំពោះការខកខានមិនបានចាប់ផ្តើមការស៊ើបអង្កេតពីសភា ដើម្បីស្វែករកមន្ត្រីទទួលខុសត្រូវ។ រដ្ឋាភិបាលបដិសេធពីការមានកំហុសឆ្គងណាមួយ ហើយលើកឡើងថា វាអាស្រ័យលើប្រព័ន្ធតុលាការ ក្នុងការស៊ើបអង្កេតគ្រោះថ្នាក់នេះ៕