ក្រុមអ្នកជំនាញអាហ្វ្រិកខាងត្បូង បានព្រមានពីគ្រោះមហន្តរាយធំ ក្រោយគម្រោងសុខភាពជុំវិញពិភពលោក រួមទាំងគម្រោងផ្តល់ការថែទាំសុខភាពសង្រ្គោះអាយុជីវិត ទទួលបានការជូនដំណឹងបញ្ចប់ ពីរដ្ឋាភិបាលសហរដ្ឋអាមេរិកកាលពីថ្ងៃព្រហស្បតិ៍ ពេលដែលរដ្ឋបាលរបស់លោកប្រធានាធិបតី Donald Trump ចាប់ផ្តើមគ្រប់គ្រងការផ្តល់ជូនស្របតាមផលប្រយោជន៍ជាតិជាធំរបស់ខ្លួន ។

លោក Trumpបានបញ្ជាឲ្យផ្អាករយៈពេល ៩០ថ្ងៃលើជំនួយបរទេសទាំងអស់កាលពីខែមករាកន្លងទៅ ដោយរង់ចាំការវាយតម្លៃបន្ថែមទៀត ពីភាពស៊ីសង្វាក់គ្នាជាមួយនឹងគោលនយោបាយការបរទេស “អាមេរិកជាធំ” របស់លោក ។

កម្មវិធី HIV/AIDSធំបំផុតជាច្រើនផ្តល់មូលនិធិដោយសហរដ្ឋអាមេរិក នៅអាហ្វ្រិកខាងត្បូង ត្រូវបានគេនិយាយប្រាប់ថា ការផ្តល់មូលនិធិលែងមានទៀតហើយ ។ កម្មវិធីមួយចំនួនដែលត្រូវបានកាត់ផ្តាច់នៅអាហ្វ្រិក បានផ្តល់សេវាកម្ម HIV/AIDS សម្រាប់មនុស្សងាយរងគ្រោះ ដូចជាមនុស្សស្រលាញ់ភេទដូចគ្នា និងស្រ្តីបម្រើផ្លូវភេទ ក៏ដូចជាការធ្វើតេស្ត និងសេវាកម្មថែទាំសុខភាពដល់មនុស្សទូទៅ ។

សូមបញ្ជាក់ថា អាហ្វ្រិកខាងត្បូងគឺជាប្រទេសមានមនុស្សផ្ទុកវីរុស HIV ច្រើនជាងគេបំផុតរបស់ពិភពលោកចំនួនប្រហែល ៨លាននាក់ ៕