នគរបាលអ៊ីតាលី នៅថ្ងៃសុក្រ (ទី២៨ ខែកុម្ភៈ) នេះ បានឲ្យដឹងថា ពួកគេបានធ្វើប្រតិបត្តិការថ្នាក់ជាតិ «ទ្រង់ទ្រាយធំ» ដើម្បីបោសសម្អាតក្រុមចែកចាយរូបអាសអាភាសកុមារ តាមប្រព័ន្ធអ៊ីនធឺណិត ដោយចាប់ខ្លួនមនុស្សបានចំនួន ៣៤នាក់ និងធ្វើការស្រាវជ្រាវ នៅក្នុងទីក្រុងជាង ៥០។

នគរបាល នៅទីក្រុង Catania នៃតំបន់ Sicily បានឲ្យដឹងនៅក្នុងសេចក្តីថ្លែងការណ៍មួយថា ឯកសារកុំព្យូទ័រខុសច្បាប់រាប់ម៉ឺន ត្រូវបានរកឃើញនៅក្នុងកុំព្យូទ័រដែលរឹបអូសបាន បន្ទាប់ពីមានការឆែកឆេរ ១១៥លើក លើផ្ទះ និងកុំព្យូទ័រ អំឡុងការបញ្ចប់នៃ «ការស៊ើបអង្កេតដ៏យូរ និងស្មុគស្មាញ»។

ប្រតិបត្តិការសម្ងាត់នេះ បានអនុញ្ញាតឲ្យមន្រ្តីនគរបាលប្រៃសណីយ៍កំណត់អត្តសញ្ញាណក្រុមជាច្រើន ជាអ្វីដែលខ្លួនហៅថា កម្មវិធីផ្ញើសារភ្លាមៗ «ដ៏ល្បីល្បាញ»។

ជនសង្ស័យភាគច្រើនបានប្រើប្រព័ន្ធផ្ញើសារលេខកូដសម្ងាត់ ដើម្បីលាក់ទំនាក់ទំនង ដែលធ្វើឲ្យមានការពិបាក ក្នុងការកំណត់អត្តសញ្ញាណលើពួកគេ។ នគរបាលបានឲ្យដឹងបន្ថែមថា អ្នកដែលត្រូវបានចាប់ខ្លួនទាំងអស់ គឺជាបុរសដែលមានអាយុចន្លោះពី ២១ ទៅ ៥៩ឆ្នាំ ដែលមកពីគ្រប់មជ្ឈដ្ឋាន ក្នុងសង្គម និងរស់នៅពាសពេញប្រទេសអ៊ីតាលី៕