រដ្ឋមន្ត្រីការបរទេសអាមេរិកលោក Marco Rubio កាលពីថ្ងៃសុក្រ (ទី២៨ ខែកុម្ភៈ) បានអំពាវនាវឲ្យមេដឹកនាំអ៊ុយក្រែន លោក Volodymyr Zelensky សុំអភ័យទោស ចំពោះការប៉ះទង្គិចគ្នា ជាមួយប្រធានាធិបតី លោក Donald Trump។

បន្ទាប់ពីកិច្ចពិភាក្សា នៅការិយាល័យ Oval Office បានប្រែទៅជាការឈ្លោះប្រកែកគ្នា និងការដំឡើងសំឡេងដាក់គ្នា តាមរយៈសារព័ត៌មាន CNN លោក Rubio បាននិយាយថា លោក Zelensky គួរតែ «សុំអភ័យទោស ដែលបានធ្វើឲ្យយើងខាតពេលវេលា សម្រាប់កិច្ចប្រជុំ ដែលបញ្ចប់ទៅដោយរបៀបនេះ»។ ជាមួយគ្នានេះ លោក Rubio ក៏បានចោទសួរផងដែរថា តើលោក Zelensky ប្រធានាធិបតីនៃប្រទេសដែលបានស៊ូទ្រាំនឹងសង្រ្គាមជាង ៣ឆ្នាំបន្ទាប់ពីមានការលុកលុយរបស់រុស្ស៊ី នៅខែកុម្ភៈ ឆ្នាំ២០២២ ចង់ឲ្យវាបញ្ចប់ដែរ ឬអត់។

អ្នកការទូតជាន់ខ្ពស់របស់សហរដ្ឋអាមេរិករូបនេះ បានបន្ថែមថា៖ «អ្នកចាប់ផ្តើមយល់ហើយមែនទេថា លោក Zelensky ប្រហែលជាមិនចង់បានកិច្ចព្រមព្រៀងសន្តិភាពទេ។ គាត់និយាយថា គាត់ចង់បាន ប៉ុន្តែប្រហែលជាគាត់មិនចង់បានទេ ហើយសកម្មភាពបើកចំហ ដែលធ្វើឲ្យខូចដល់កិច្ចប្រឹងប្រែង ដើម្បីនាំមកនូវសន្តិភាព គឺជាការផ្ដល់ការខកចិត្តយ៉ាងខ្លាំងដល់អ្នកដែលបានចូលរួមពាក់ព័ន្ធ»។

គួរបញ្ជាក់ថា ជំនួបនៅទីក្រុងវ៉ាស៊ីនតោន រវាងលោក Trump និងលោក Zelensky គឺមានបំណងធ្វើឲ្យទំនាក់ទំនងផ្ទាល់ខ្លួន រវាងមេដឹកនាំទាំង២ មានភាពរលូន។ ពួកគេគ្រោងនឹងចុះហត្ថលេខាលើកិច្ចព្រមព្រៀងមួយ ដែលនឹងចែករំលែកប្រាក់ចំណេញពីប្រភពធនធានរ៉ែសំខាន់ៗរបស់អ៊ុយក្រែន ជាមួយសហរដ្ឋអាមេរិក។ ផ្ទុយទៅវិញ ជំនួបនោះបានប្រែក្លាយទៅជាការដំឡើងសំឡេងដាក់គ្នា នៅពីមុខកាមេរ៉ាអ្នកសារព័ត៌មាន ខណៈដែលលោក Trump បានធ្វើឲ្យលោក Zelensky ខឹងសម្បាយ៉ាងខ្លាំង ដោយបដិសេធមិនថ្កោលទោសរុស្ស៊ី ដែលបានបើកការលុកលុយពេញបន្ទុកលើអ៊ុយក្រែនកាលពី ៣ឆ្នាំមុន និងបានកាន់កាប់ដែនដីខ្លះរបស់ខ្លួន តាំងពីឆ្នាំ២០១៤ មក។

លោក Zelensky បានជំទាស់ដោយបើកចំហចំពោះលោក Trump ជុំវិញវិធីសាស្រ្តរបស់លោកដែលមានចំពោះប្រធានាធិបតីរុស្ស៊ី លោក Vladimir Putin នៅក្នុងកិច្ចប្រជុំនេះ ដោយជំរុញឲ្យលោក «កុំធ្វើសម្បទានជាមួយឃាតករ»។ ចំណែកលោក Trump បានចោទប្រកាន់លោក Zelensky ថា បានបង្កជាហានិភ័យឲ្យមានសង្គ្រាមលោកលើកទី៣ និងមិនបានដឹងគុណ ចំពោះទីក្រុងវ៉ាស៊ីនតោនដែលបានផ្តល់ជំនួយយោធាឲ្យអ៊ុយក្រែន៕