ដោយដកស្រង់សម្ដីពីបុគ្គលដែលដឹងបញ្ហានេះ សាព័ត៌មាន Wall Street Journal (WSJ) កាលពីថ្ងៃសុក្រ (ទី២៨ ខែកុម្ភៈ) បានរាយការណ៍ថា អាជ្ញាធរចិនកំពុងណែនាំសហគ្រិន និងអ្នកស្រាវជ្រាវបញ្ញាសិប្បនិម្មិត (AI) ធំៗរបស់ប្រទេស ឲ្យចៀសវាងការធ្វើដំណើរទៅកាន់សហរដ្ឋអាមេរិក។

ពាក់ព័ន្ធនឹងការណែនាំនេះ សារព័ត៌មាននេះ បានឲ្យដឹងថា អាជ្ញាធរមានក្ដីបារម្ភថា អ្នកជំនាញ AI របស់ចិន ដែលធ្វើដំណើរទៅក្រៅប្រទេសអាចបញ្ចេញព័ត៌មានសម្ងាត់ អំពីវឌ្ឍនភាពរបស់ប្រទេស។

ហើយជាមួយគ្នានេះ សារព័ត៌មាន WSJ បានឲ្យដឹងទៀតថា អាជ្ញាធរក៏បារម្ភផងដែរថា នាយកប្រតិបត្តិអាចត្រូវបានចាប់ឃុំខ្លួន និងប្រើប្រាស់ជាចំណុចតថ្លៃ ក្នុងកិច្ចចរចារ រវាងសហរដ្ឋអាមេរិក និងចិន ដោយលើកឡើងពីភាពស្រដៀងគ្នាទៅនឹងការឃុំខ្លួន ចំពោះនាយកប្រតិបត្តិក្រុមហ៊ុន Huawei នៅក្នុងប្រទេសកាណាដា តាមសំណើរបស់ទីក្រុងវ៉ាស៊ីនតោន ក្នុងអំឡុងអាណត្តិដំបូងរបស់រដ្ឋបាលលោក Donald Trump។

សេតវិមាន និងការិយាល័យព័ត៌មានក្រុមប្រឹក្សារដ្ឋរបស់ប្រទេសចិន មិនបានឆ្លើយតបភ្លាមៗនោះឡើយ ចំពោះសំណើរបស់សារព័ត៌មាន Reuters ដើម្បីសុំការអត្ថាធិប្បាយ ពាក់ព័ន្ធនឹងសេចក្ដីរាយការណ៍នេះ។

របាយការណ៍របស់សារព័ត៌មាននេះ បានបង្ហាញថា នាយកប្រតិបត្តិ នៅក្រុមហ៊ុនឈានមុខគេរបស់ចិន ក្នុងវិស័យ AI និងឧស្សាហកម្មរសើបជាយុទ្ធសាស្ត្រផ្សេងទៀត ដូចជាមនុស្សយន្តជាដើម កំពុងតែត្រូវបានលើកទឹកចិត្តកុំឲ្យធ្វើដំណើរទៅសហរដ្ឋអាមេរិក និងសម្ព័ន្ធមិត្តរបស់ប្រទេសនេះ លើកលែងតែករណីចាំបាច់។

យោងតាមរបាយការណ៍នេះ បានឲ្យដឹងថា លោក Liang Wenfeng ដែលជាស្ថាបនិកក្រុមហ៊ុន AI គឺ DeepSeek របស់ចិន បានបដិសេធការអញ្ជើញឲ្យទៅចូលរួមកិច្ចប្រជុំកំពូល AI នៅទីក្រុងប៉ារីស ប្រទេសបារាំង ក្នុងខែកុម្ភៈ។ សារព័ត៌មានដដែល បានបន្ថែមថា ស្ថាបនិកក្រុមហ៊ុន AI ដ៏ធំមួយទៀតរបស់ចិន បានលុបចោលដំណើរកម្សាន្តទៅកាន់សហរដ្ឋអាមេរិក នៅឆ្នាំ២០២៤ តាមការណែនាំពីទីក្រុងប៉េកាំង៕