រដ្ឋមន្ត្រីក្រសួងរតនាគារអាមេរិក លោក Scott Bessent កាលពីថ្ងៃសុក្រ (ទី២៨ ខែកុម្ភៈ) បានជំរុញឲ្យប្រទេសកាណាដា អនុវត្តតាមម៉ិកស៊ិក ដើម្បីធ្វើឲ្យត្រូវគ្នាជាមួយពន្ធអាមេរិក លើទំនិញរបស់ប្រទេសចិន ខណៈដែលប្រទេសជិតខាងរបស់សហរដ្ឋអាមេរិកទាំង២ បានព្យាយាមបញ្ចៀសការដាក់ទណ្ឌកម្មដោយការដំឡើងពន្ធ ២៥ភាគរយ ដែលនឹងត្រូវចូលជាធរមាន នៅថ្ងៃទី៤ ខែមីនា ជុំវិញការជួញដូរសារធាតុហ្វង់តានីល។

មន្ត្រីកាណាដា និងម៉ិកស៊ិក បានធ្វើដំណើរទៅពាសពេញទីក្រុងវ៉ាស៊ីនតោន ក្នុងគោលបំណងប្រឹងប្រែងបង្ហាញដល់រដ្ឋបាលរបស់លោកប្រធានាធិបតី Donald Trump ថា ពួកគេកំពុងធ្វើឲ្យមានវឌ្ឍនភាព ក្នុងការធានាឲ្យមានការរឹតបន្តឹងព្រំដែនជាមួយសហរដ្ឋអាមេរិក ដើម្បីទប់ស្កាត់លំហូរនៃសារធាតុញៀនដ៏គ្រោះថ្នាក់។

នៅក្នុងបទសម្ភាសន៍ជាមួយទូរទស្សន៍ Bloomberg លោក Bessent បាននិយាយថា ប្រទេសម៉ិកស៊ិកបានស្នើឡើងនូវអ្វីដែលត្រូវគ្នានឹងពន្ធគយរបស់សហរដ្ឋអាមេរិក ដោយមានគោលដៅទៅលើប្រទេសចិន ប៉ុន្តែលោកមិនបានបញ្ជាក់ពីកម្រិតណានោះទេ។

លោក Bessent បានប្រាប់ថា៖ «ខ្ញុំគិតថា វានឹងជាកាយវិការដ៏ល្អមួយ ប្រសិនបើកាណាដា បានអនុវត្តបែបនេះផងដែរ ដូច្នេះតាមរបៀបមួយ យើងអាចមានតំបន់ការពារ នៅអាមេរិកខាងជើងចំនួន២ ដើម្បីរារាំងនៃការនាំចូលរបស់ចិន ដែលចេញពីសេដ្ឋកិច្ចមិនមានតុល្យភាពបំផុត នៅក្នុងប្រវត្តិសាស្រ្តនៃសម័យទំនើប»។

គួររំលឹកថា កាលពីថ្ងៃទី៤ ខែកុម្ភៈ លោក Trump បានប្រកាសយកពន្ធ ១០ភាគរយលើការនាំចូលរបស់ចិនទាំងអស់ បន្ទាប់មក នៅថ្ងៃទី២៧ ខែកុម្ភៈ បាននិយាយថា លោកនឹងបង្កើនទ្វេដងដល់ ២០ភាគរយ ចាប់ពីថ្ងៃទី៤ ខែមីនា។

ស្ថានទូតចិន ប្រចាំនៅទីក្រុងវ៉ាស៊ីនតោន បាននិយាយថា ការដំឡើងពន្ធជាឯកតោភាគីរបស់លោក Trump នឹងបំពានយ៉ាងធ្ងន់ធ្ងរលើច្បាប់របស់អង្គការពាណិជ្ជកម្មពិភពលោក និងប៉ះពាល់ដល់ផលប្រយោជន៍ទាំងចិន និងសហរដ្ឋអាមេរិក៕