ប្រធានាធិបតីអ៊ុយក្រែន លោក Volodymyr Zelenskiy នៅថ្ងៃសៅរ៍ (ទី១ ខែមីនា) នេះ បានប្រាប់ថា វាមានសារៈសំខាន់ខ្លាំងណាស់ ដែលស្ថានភាពរបស់អ៊ុយក្រែន ត្រូវបានគេដឹងឮគ្រប់គ្នា និងមិនមែនត្រូវបានបំភ្លេចចោលនោះឡើយ ដោយការលើកឡើងនេះកើតមានមួយថ្ងៃបន្ទាប់ពីមាននូវកិច្ចប្រជុំដ៏ក្តៅគគុកជាមួយប្រធានាធិបតីអាមេរិក លោក Donald Trump នៅសេតវិមាន។

តាមរយៈការបង្ហោះ នៅបណ្ដាញសង្គម អមជាមួយនឹងវីដេអូនៃកិច្ចប្រជុំជាមួយសហគមន៍អ៊ុយក្រែន នៅទីក្រុងវ៉ាស៊ីនតោន សហរដ្ឋអាមេរិក លោក Zelenskiy បានលើកឡើងថា៖ «វាមានសារៈសំខាន់ខ្លាំងណាស់ សម្រាប់ពួកយើងដែលអ៊ុយក្រែនត្រូវបានគេដឹងឮគ្រប់គ្នា ហើយថា គ្មាននរណាម្នាក់ភ្លេចស្ថានភាពនេះបានឡើយ ទាំងក្នុងអំឡុងពេលមានសង្រ្គាម និងបន្ទាប់ពីនោះ»។

លោកបានបន្ថែមថា៖ «វាមានសារៈសំខាន់ណាស់ សម្រាប់ប្រជាជន នៅក្នុងប្រទេសអ៊ុយក្រែន ក្នុងការបានដឹងថា ពួកគេមិនមែនឯកោនោះទេ និងដឹងថា ផលប្រយោជន៍របស់ពួកគេ មានតំណាងនៅគ្រប់ប្រទេស នៅគ្រប់ជ្រុងនៃពិភពលោក»។

គួរបញ្ជាក់ថា កាលថ្ងៃសុក្រ (ទី២៨ ខែកុម្ភៈ) លោក Zelenskiy បានមានកិច្ចប្រជុំនៅការិយាល័យ Oval Office ជាមួយលោក Trump និងអនុប្រធានាធិបតី លោក J.D. Vance ជាឱកាសមួយ ដើម្បីទទួលបានការគាំទ្របន្ថែមទៀត សម្រាប់កិច្ចប្រឹងប្រែងសង្រ្គាមរបស់ទីក្រុងគីវ ប្រឆាំងនឹងរុស្ស៊ី។

ប៉ុន្តែគួរឲ្យសោកស្ដាយ កិច្ចប្រជុំនោះបានបញ្ចប់ទៅជាមួយនឹងការអាក់អន់ស្រពន់ចិត្តនឹងគ្នា ហើយបានជំរុញឲ្យទំនាក់ទំនងជាមួយសម្ព័ន្ធមិត្តដ៏សំខាន់បំផុត ក្នុងសម័យសង្គ្រាមរបស់ទីក្រុងគីវ ធ្លាក់ដល់កម្រិតទាបថ្មី៕