ការិយាល័យនាយករដ្ឋមន្ត្រីអ៊ីស្រាអែលបាននិយាយនៅព្រឹកថ្ងៃអាទិត្យ ២ មីនា ប៉ុន្មានម៉ោងបន្ទាប់ពីដំណាក់កាលដំបូងនៃបទឈប់បាញ់ដែលបានព្រមព្រៀងគ្នាដំណាក់កាលទី១បានផុតកំណត់កាលពីថ្ងៃសៅរ៍ទី១មីនា ថា អ៊ីស្រាអែលនឹងអនុម័តសំណើរបស់បេសកជនលោក Steve Witkoff របស់ប្រធានាធិបតីអាមេរិក Donald Trump សម្រាប់បទឈប់បាញ់បណ្តោះអាសន្ននៅហ្កាហ្សាសម្រាប់បុណ្យរ៉ាម៉ាដាន និងថ្ងៃវិសមកាលនិទាឃរដូវរបស់ជនជាតិជ្វីហ្វ។  

ការិយាល័យរបស់នាយករដ្ឋមន្ត្រី Benjamin Netanyahu បាននិយាយថា នៅថ្ងៃដំបូងនៃសំណើរបស់លោក Witkoff ចំណាប់ខ្មាំងពាក់កណ្តាលដែលត្រូវបានឃុំខ្លួននៅហ្កាហ្សា ទាំងនៅរស់ និងស្លាប់នឹងត្រូវបានដោះលែង ការិយាល័យរបស់នាយករដ្ឋមន្ត្រីបន្ថែមថា ចំណាប់ខ្មាំងដែលនៅសេសសល់ក៏នឹងត្រូវដោះលែងផងដែរ បន្ទាប់ពីបទឈប់បាញ់ជាអចិន្ត្រៃយ៍ត្រូវបានយល់ព្រម។

ការិយាល័យរបស់លោក Netanyahu បានបន្ថែមទៀតថា លោក Witkoff បានធ្វើសំណើដើម្បីបន្តបទឈប់បាញ់បច្ចុប្បន្ន បន្ទាប់ពីដឹងថាត្រូវការពេលវេលាបន្ថែមទៀតសម្រាប់កិច្ចពិភាក្សាស្តីពីបទឈប់បាញ់ជាអចិន្ត្រៃយ៍។

អ្នកនាំពាក្យក្រុមហាម៉ាស លោក Hazem Qassem បាននិយាយកាលពីព្រឹកថ្ងៃសៅរ៍ថា ក្រុមនេះបានច្រានចោល "ការបង្កើតរូបមន្ត" របស់អ៊ីស្រាអែល ក្នុងការបន្តដំណាក់កាលទី ១ នៃបទឈប់បាញ់នៅក្នុងតំបន់ហ្កាហ្សា ប៉ុន្តែពុំបាននិយាយច្បាស់ពីផែនការរបស់លោក Witkoff នោះទេ។ 

ការិយាល័យរបស់លោក Netanyahu បាននិយាយថា អ៊ីស្រាអែលនឹងធ្វើការចរចាភ្លាមៗលើផែនការរបស់លោក Witkoff ប្រសិនបើក្រុមហាម៉ាសយល់ព្រម៕