​

នាយករដ្ឋមន្ត្រីចក្រភពអង់គ្លេសលោក Keir Starmer កាលពីថ្ងៃសៅរ៍ ១ មីនា បានស្វាគមន៍យ៉ាងកក់ក្តៅនូវវត្តមានលោក Volodymyr Zelenskyy នៅទីក្រុងឡុងដ៍មួយថ្ងៃបន្ទាប់ពីការប៉ះទង្គិចពាក្យសម្ដីគ្នារបស់មេដឹកនាំអ៊ុយក្រែនជាមួយប្រធានាធិបតីអាមេរិក Donald Trump ។

ហើយនៅមុនកិច្ចប្រជុំកំពូលនៅថ្ងៃអាទិត្យក្នុងទីក្រុងឡុងដ៍ ដើម្បីពិភាក្សាអំពីរបៀបគាំទ្រអ៊ុយក្រែនស្របពេលកំពុងប្រយុទ្ធនឹងកងកម្លាំងរបស់រុស្ស៊ី លោក Starmer បានរំលឹកឡើងវិញនូវការគាំទ្ររបស់លោកចំពោះទីក្រុង Kyiv ។

លោកបាននិយាយនៅក្នុងសេចក្តីថ្លែងការណ៍មួយដែលបានចេញផ្សាយកាលពីល្ងាចថ្ងៃសៅរ៍ថា "នៅក្នុងភាពជាដៃគូជាមួយសម្ព័ន្ធមិត្តរបស់យើង យើងត្រូវពង្រឹងការរៀបចំរបស់យើងសម្រាប់ការធានាសន្តិសុខរបស់អឺរ៉ុប ដោយការបន្តពិភាក្សាជាមួយសហរដ្ឋអាមេរិក" ។  

លោកបានបន្ថែមថា "ឥឡូវនេះគឺជាពេលវេលាសម្រាប់យើងរួបរួមគ្នាដើម្បីធានានូវលទ្ធផលល្អបំផុតសម្រាប់អ៊ុយក្រែន ការពារសន្តិសុខអឺរ៉ុប និងធានាអនាគតរួមរបស់យើង" ។

ប៉ុន្មានម៉ោងមុននេះ អ៊ុយក្រែន និងចក្រភពអង់គ្លេសបានបង្ហាញកិច្ចព្រមព្រៀងប្រាក់កម្ចីចំនួន២,២៦ ពាន់លានផោន ស្មើ២,៨៤ពាន់លានដុល្លារ ដើម្បីគាំទ្រដល់សមត្ថភាពការពារជាតិរបស់អ៊ុយក្រែន ដែលនឹងត្រូវសងវិញដោយប្រើប្រាក់ចំណេញនៃទ្រព្យសម្បត្តិអធិបតេយ្យភាពរុស្ស៊ី ដែលត្រូវបានបង្កក៕