​បាល់ទាត់៖ ​ខ្សែប្រយុទ្ធ​ប៊ែ​ល​ហ្ស៊ិ​ក Romelu Lukaku នឹង​អាច​វិល​មកវិញ​រាត្រី​នេះ​ពេល Chelsea ជួប​ជាមួយ​សេះបង្កង់ Juventus នៅ Stamford Bridge ក្របខណ្ឌ UEFA Champions League​។ ​Lukaku បាន​អវត្តមាន​ពី​ការប្រកួត​តាំងពី​ដើមខែ​វិច្ឆិកា​នេះ​ម្ល៉េះ​ដោយសារ​របួស​កជើង​។

​​អ្នកចាត់ការ Chelsea លោក Thomas Tuchel បញ្ជាក់​ថា Lukaku នៅ​ពេល​នេះ​បានជា​សះស្បើយ​ហើយ និង​បាន​ហ្វឹកហាត់​កាលពី​ថ្ងៃអាទិត្យ ខណៈ​យប់​នេះ​គេ​នឹង​អាច​ជា​កីឡាករ​បម្រុង​។​ ​Chelsea បច្ចុប្បន្ន​កំពុង​ឈរ​លេខ ២ ក្នុង​ពូ​ល H ៣​ពិន្ទុ​ពីក្រោយ​ក្រុម​នាំ​មុខ​គេ Juventus​។ ​​Chelsea ត្រូវការ​ ១​ពិន្ទុ​ទៀត​ដើម្បី​ធានាថា​មាន​កៅអី​នៅ​វគ្គ ១៦ក្រុម​ចុងក្រោយ​។ ​​ដោយឡែក​សំរាប់​កីឡាករ​ផ្សេងទៀត Kai Havertz មិនទាន់​ច្បាស់​ថា​ លេង​បាន​រឺ​អត់​ឡើយ​ដោយសារ​មាន​បញ្ហា​ស​សៃ​ពួរ​ បន្ទាប់ពី​ត្រូវបាន​ផ្លាស់ចេញ​ពេល Chelsea យកឈ្នះ Leicester ៣-០ កាលពី​ថ្ងៃ​សៅរ៍​។​

​​ជាមួយគ្នា​នោះដែរ​ខ្សែប្រយុទ្ធ​អាល្លឺម៉ង់ Timo Werner ក៏​ជា​ពីរ​បួស​ដែរ​ក្រោយ​បាន​ចូល​លេង​នៅ​វគ្គ​ទី២ ទល់នឹង Leicester City​។​ ​​ចំណែក Juventus នឹង​អវត្តមាន​កីឡាករ​មួយចំនួន​ដូចជា​អតីត​ខ្សែបម្រើ Arsenal, Aaron Ramsey, ខ្សែការពារ​អ៊ីតាលី Georgio Chiellini និង​ខ្សែប្រយុទ្ធ Federico Bernardeschi៕

​អត្ថបទ​៖​នាង សុភា​វុ​ធ