សន្និសីទអង្គការសហប្រជាជាតិស្តីពីសន្ធិសញ្ញាហាមឃាត់អាវុធនុយក្លេអ៊ែរ នឹងបើកនៅថ្ងៃចន្ទនេះនៅទីក្រុងញូវយ៉ក សហរដ្ឋអាមេរិក។ អ្នកនៅរស់រានមានជីវិតពីគ្រាប់បែកបរមាណូរបស់ប្រទេសជប៉ុននឹងចូលរួមក្នុងសន្និសីទនេះ។

Nihon Hidankyo គឺជាក្រុម Hibakusha ឬក្រុមអ្នករស់រានមានជីវិតពីគ្រាប់បែក បានទទួលរង្វាន់ណូបែលសន្តិភាព កាលពីឆ្នាំមុន។ ក្រុមនេះ បានបញ្ជូន លោក Hamasumi Jiro និង Wada Masako ទៅកិច្ចប្រជុំលើកទីបីនៃរដ្ឋភាគីនៃសន្ធិសញ្ញាស្តីពីការហាមឃាត់អាវុធនុយក្លេអ៊ែរ។ សន្និសីទនេះប្រព្រឹត្តទៅចាប់ពីថ្ងៃច័ន្ទ រហូតដល់ថ្ងៃសុក្រ នៅទីស្នាក់ការអង្គការសហប្រជាជាតិ។

សន្ធិសញ្ញា បានចូលជាធរមានកាលពីឆ្នាំ២០២១។ វាបានហាមឃាត់ការផលិត ការប្រើប្រាស់ និងសកម្មភាពផ្សេងៗទៀតដែលទាក់ទងនឹងអាវុធនុយក្លេអ៊ែរ។ រហូតមកដល់ពេលនេះ វាត្រូវបានចុះហត្ថលេខាដោយប្រទេស និងតំបន់ចំនួន៩៤និងបានផ្តល់សច្ចាប័នដោយប្រទេសចំនួន៧៣ ក្នុងចំណោមប្រទេសទាំងអស់។ ទោះជាយ៉ាងណា ប្រទេសដែលមានអាវុធនុយក្លេអ៊ែរ ដូចជាសហរដ្ឋអាមេរិក និងរុស្ស៊ី នឹងមិនចូលរួមក្នុងសន្និសីទនេះទេ។

ប្រទេសជប៉ុន ដែលស្ថិតនៅក្រោមឆ័ត្រនុយក្លេអ៊ែររបស់សហរដ្ឋអាមេរិក ក៏ពុំមែនជាសមាជិកដែរ។ រដ្ឋាភិបាលជប៉ុន បានសម្រេចមិនចូលរួមក្នុងកិច្ចប្រជុំក្នុងនាមជាអ្នកសង្កេតការណ៍នោះទេ។ កិច្ចប្រជុំនេះ ធ្វើឡើង ខណៈការឈ្លានពានរបស់រុស្ស៊ីទៅលើអ៊ុយក្រែននៅបន្ត ដោយការគំរាមកំហែងនុយក្លេអ៊ែរ ដដែលៗ។

ប្រទេសចិន ត្រូវបានគេនិយាយថាកំពុងកសាងសមត្ថភាពនុយក្លេអ៊ែររបស់ខ្លួន ហើយប្រទេសកូរ៉េខាងជើង ក៏នៅតែបន្តកម្មវិធីនុយក្លេអ៊ែរ និងមីស៊ីល។ ប្រធានាធិបតីសហរដ្ឋអាមេរិក លោក ដូណាល់ ត្រាំ បានបង្ហាញឆន្ទៈធ្វើការឆ្ពោះទៅរកការកាត់បន្ថយអាវុធនុយក្លេអ៊ែរជាមួយរុស្ស៊ី និងប្រទេសចិន។ ប៉ុន្តែលោកមិនបានបង្ហាញផែនការជាក់លាក់ណាមួយឡើយ ហើយការចរចាជាសាកលស្តីពីការរំសាយអាវុធនុយក្លេអ៊ែរ នៅតែមានភាពជាប់គាំង។