កងពលតូចដឹកជញ្ជូនលេខ៩៩ ព្រឹកថ្ងៃទី៣ ខែមីនា ឆ្នាំ២០២៥នេះ បាន​ប្រារព្ធ​ពិធី​អបអរ​សាទរ​ទិវា​អន្តរជាតិនារី ៨មីនា លើកទី១១៤ ក្រោមប្រធានបទ «សិទ្ធិសមភាព និងភាពអង់​អាច​ចំពោះ​ស្ត្រី​ និង​ក្មេងស្រីគ្រប់រូប» ក្រោមអធិបតីភាពឧត្តមសេនីយ៍ទោ ហ៊ុល សំអុន មេបញ្ជាការ​កង​ពល​តូច​ដឹក​ជញ្ជូនលេខ៩៩ ឧត្តមសេនីយ៍ត្រី សរ ស្រី មេបញ្ជារង និងជាប្រធាន​ក្រុម​ការងារ​យេនឌ័រ​កង​ពលតូចដឹកជញ្ជូនលេខលេ៩៩ ព្រមទាំងយោធិននារីជាច្រើននាក់ទៀត។

សូមបញ្ជាក់ថា ទិវាអន្តរជាតិ ៨មីនា ឆ្នាំ២០២៥ ខួបលើកទី១១៤ ត្រូវបាន​ប្រារព្ធ​ឡើង​ក្នុង​គោល​បំណង​ដើម្បី​គូសបញ្ជាក់អំពីសារៈសំខាន់នៃការទទួលបាន និងអនុវត្តសិទ្ធិ ការលើកកម្ពស់​សមភាព និងការពង្រឹងភាពអង់អាចចំពោះស្ត្រីនិងក្មេងស្រីគ្រប់រូបនៅកម្ពុជា។ ប្រធាន​បទ​នេះ​ក៏​ផ្តោត​សំខាន់​ផងដែរ លើការលើកកម្ពស់ផលជាវិជ្ជមាន និងទាញយក​អត្ថ​ប្រយោជន៍​ពី​ភាគ​លាភ​យេនឌ័រ​ជូន​គ្រួសារ ពង្រឹងសហគមន៍និងវឌ្ឍនភាពសង្គម ជំរុញកំណើនការអភិវឌ្ឍសេដ្ឋកិច្ច និង​លើក​កម្ពស់សុខុមាលភាពសង្គម ជាមួយការឆ្លុះបញ្ចាំងអំពីវឌ្ឍនភាព សមិទ្ធផល បញ្ហាប្រឈម កាលានុវត្តភាពនានា ជាពិសេស​បង្ហាញ​ពី​ការ​ប្តេជ្ញា​ចិត្ត​ និង​វិធានការ​វិជ្ជមាន​ក្នុង​ការ​លើក​កម្ពស់​សមភាព​យេនឌ័រ និងបង្កើនភាពអង់អាចដល់ស្ត្រី និងក្មេងស្រីគ្រប់រូបនៅកម្ពុជា៕