ប៉ុន្មានខែផ្ទុះសង្គ្រាមរវាងរុស្ស៊ី និងអ៊ុយក្រែន ពេលនោះលោកប្រធានាធិបតី Joe Biden បានសន្ទនាតាមទូរស័ព្ទជាលក្ខណៈឯកជនយ៉ាងក្តៅគគុកជាមួយប្រធានាធិបតីអ៊ុយក្រែន Zelenskyy រាប់បញ្ចូលទាំងលោក Biden ដែលត្រូវលើកឡើងថា បានបាត់បង់ "ការអត់ធ្មត់" និងអំពាវនាវឱ្យអ៊ុយក្រែន "បង្ហាញការដឹងគុណបន្តិចបន្ថែមទៀត" ចំពោះសហរដ្ឋអាមេរិកសម្រាប់ការគាំទ្រ។ 

លោក Biden ស្ទើរតែលែងប្រាប់លោក Zelenskyy ថាលោកទើបតែបានបើកភ្លើងខៀវផ្ដល់ជំនួយ១ពាន់លានដុល្លារបន្ថែមក្នុងជំនួយយោធារបស់សហរដ្ឋអាមេរិកសម្រាប់អ៊ុយក្រែននៅពេលលោក Zelenskyy បានចាប់ផ្តើមរាយបញ្ជីជំនួយបន្ថែមទាំងអស់ ដែលលោកត្រូវការ និងមិនទទួលបាន" នេះបើយោងតាមរបាយការណ៍របស់សារព័ត៌មាន NBC ដែលបានចេញផ្សាយក្នុងខែវិច្ឆិកា ឆ្នាំ ២០២២ដោយរំលឹកឡើងវិញនូវការហៅទូរស័ព្ទមុនខែមិថុនា ឆ្នាំ ២០២២ ដែលលោក Biden និងលោក Zelenskyy ពិភាក្សា។        

របាយការណ៍បានបន្តទៀតថាលោកBiden បានបាត់បង់ការអត់ធ្មត់។ លោកបាននិយាយដំឡើង     សម្លេងថា ប្រជាជនអាមេរិកមានចិត្តសប្បុរស ហើយរដ្ឋបាលរបស់លោក និងយោធាអាមេរិក កំពុងធ្វើការយ៉ាងខ្លាំងជួយអ៊ុយក្រែនហោចណាស់លោក Zelenskyy អាចបង្ហាញពីការដឹងគុណបន្ថែមទៀតចំពោះអាមេរិក។    

កាលពីថ្ងៃសុក្រទី២៨ខែកុម្ភៈសប្ដាហ៍មុន លោកប្រធានាធិបតីអាមេរិក Trump បានប៉ះទង្គិចពាក្យសម្ដីជាមួយលោក Zelensky ដោយប្រាប់លោកឱ្យធ្វើកិច្ចព្រមព្រៀងជាមួយរុស្ស៊ីទៅ ពុំនោះអាមេរិកនឹងដកខ្លួនចេញ ។ លោកTrump បានប្រាប់លោកZelensky ថាលោកពុំបានអរគុណគ្រប់គ្រាន់សម្រាប់ការគាំទ្រផ្នែកយោធា និងនយោបាយរបស់សហរដ្ឋអាមេរិកក្នុងអំឡុងពេលប្រយុទ្ធប្រឆាំងនឹងការវាយលុករបស់រុស្ស៊ីទេ ហើយថាមេដឹកនាំអ៊ុយក្រែនកំពុងប្រឡែងលេងជាមួយល្បែងសង្គ្រាមលោកលើកទីបី៕