អ្នកនាំពាក្យក្រសួងការពារជាតិចិន បានព្រមានកោះតៃវ៉ាន់ ថា "មិនយូរមិនឆាប់ ចិននឹងក្រសោបយកកោះនេះមកនៅក្រោមការគ្រប់គ្រងរបស់ខ្លួន" បន្ទាប់ពីទីក្រុងតៃប៉ិ បានប្រកាសពីការពង្រីកសមយុទ្ធយោធា។

ការព្រមាននេះ ត្រូវបានធ្វើឡើងនៅក្នុងសន្និសីទសារព័ត៌មានមួយកាលពីថ្ងៃព្រហស្បតិ៍សប្ដាហ៍មុន ដោយអ្នកនាំពាក្យក្រសួងការពារជាតិចិន លោក Wu Qian នៅពេលត្រូវសាកសួរអំពីរបាយការណ៍ដែលថា សមយុទ្ធបាញ់គ្រាប់ពិតប្រចាំឆ្នាំរបស់កោះតៃវ៉ាន់ ឈ្មោះថា Han Kuang នឹងត្រូវពង្រីកវិសាលភាពនៅឆ្នាំនេះ។

សមយុទ្ធនោះគឺជាផ្នែកដ៏ធំមួយនៃការរៀបចំប្រព័ន្ធការពាររបស់កោះ ទប់ទល់នឹងការវាយក្រសោបរបស់ចិន ដែលបានប្តេជ្ញាថានឹងនាំយកតំបន់នេះមកគ្រប់គ្រង។ លោក Wu លើកឡើងថា “ការជ្រុលខ្លួនមិនប្រមាណកម្លាំងបែបនេះគឺមានគ្រោះថ្នាក់ណាស់ ហើយនឹងត្រូវបញ្ចប់ដោយការបំផ្លាញខ្លួនឯងប៉ុណ្ណោះ។ មិនយូរមិនឆាប់ យើងនឹងនឹងក្រសោបយកកោះនេះមកគ្រប់គ្រង"។

កោះតៃវ៉ាន់ កំពុងបង្កើនការការពាររបស់ខ្លួន ប៉ុន្តែនៅតែមិនអាចប្រៀបធៀបនឹងកម្លាំងដ៏ធំសម្បើមរបស់ចិនបាន។ អ្នកគាំទ្រដ៏ធំបំផុតជាប្រវត្តិសាស្ត្ររបស់កោះនេះគឺជាសហរដ្ឋអាមេរិក ប៉ុន្តែការគាំទ្រនោះបានក្លាយជាចម្ងល់ក្រោមអាណត្តិទីពីររបស់លោកប្រធានាធិបតី Donald Trump ដែលកាលពីសប្ដាហ៍មុន បានបដិសេធមិនឆ្លើយសំណួរទាក់ទងនឹងការការពារកោះតៃវ៉ាន់៕