សារព័ត៌មាន Global Times ដែលគាំទ្រដោយរដ្ឋរបស់ចិន បានរាយការណ៍ថា ប្រទេសចិន កំពុងរៀបចំវិធានការទប់ទល់នឹងការដំឡើងពន្ធនាំចូលថ្មីរបស់សហរដ្ឋអាមេរិក ដែលគ្រោងនឹងចូលជាធរមាននៅថ្ងៃអង្គារ (០៤ មីនា) ស្អែកនេះ ដោយការនាំចេញកសិផលរបស់អាមេរិក ទំនងជានឹងក្លាយជាគោលដៅរបស់ទីក្រុងប៉េកាំង។

ប្រធានាធិបតីអាមេរិក លោក Donald Trump កាលពីសប្តាហ៍មុន បានគំរាមដាក់ពន្ធបន្ថែម ១០% លើចិន ដែលនាំឱ្យនពន្ធថ្មីសរុបកើនឡើង ២០% ខណៈចោទទីក្រុងប៉េកាំង ថាធ្វើមិនបានគ្រប់គ្រាន់ដើម្បីបញ្ឈប់លំហូរនៃសារធាតុហ្វង់តានីលចូលទៅក្នុងអាមេរិក ប៉ុន្តែចិន រិះគន់បកទៅអាមេរិកវិញថា ប្រើលេសនោះក្នុងន័យ "គំរាមកំហែង"។

Global Times បានរាយការណ៍នៅថ្ងៃចន្ទ (០៣ មីនា) នេះដោយដកស្រង់ប្រភពអនាមិកថា "ចិនកំពុងសិក្សា និងបង្កើតវិធានការប្រឆាំងដែលពាក់ព័ន្ធ ដើម្បីឆ្លើយតបទៅនឹងការគំរាមកំហែងរបស់អាមេរិក ក្នុងការដាក់ពន្ធបន្ថែម ១០% លើផលិតផលចិន ក្រោមលេសសារធាតុហ្វង់តានីល"។

របាយការណ៍បន្ថែមថា "វិធានការប្រឆាំងទាំងនោះទំនងជានឹងរួមបញ្ចូលទាំងវិធានការយកពន្ធ និងមិនយកពន្ធជាបន្តបន្ទាប់ ហើយផលិតផលកសិកម្ម និងចំណីអាហាររបស់អាមេរិក ទំនងជានឹងត្រូវបានចុះក្នុងបញ្ជី"។ គួរឱ្យដឹងថា អាមេរិក បានងាយរងគ្រោះជាយូរមកហើយទល់នឹងចិន ដែលដាក់ការនាំចេញកសិផលរបស់អាមេរិកជាគោលដៅក្នុងគ្រាមានភាពតានតឹងពាណិជ្ជកម្ម៕