ប្រភពពីអ៊ីស្រាអែល បាននិយាយកាលពីថ្ងៃអាទិត្យ (០២ មីនា) ថា អ៊ីស្រាអែល គ្រោងនឹងអនុវត្តយុទ្ធសាស្ត្របង្កើនជម្លោះប្រឆាំងនឹងតំបន់ហ្កាហ្សាស្ទ្រីប ក្នុងរយៈពេលត្រឹមមួយសប្តាហ៍ រួមទាំងការកាត់ផ្តាច់ចរន្តអគ្គិសនី ការធ្វើឃាត និងការជម្លៀសប្រជាជនប៉ាឡេស្ទីន ចេញពីភាគខាងជើង ទៅភាគខាងត្បូងនៃតំបន់ហ៊ុមព័ទ្ធនេះ។

ប្រព័ន្ធផ្សព្វផ្សាយរដ្ឋ KAN របស់អ៊ីស្រាអែលបានរាយការណ៍ដោយដកស្រង់ប្រភពព័ត៌មានមិនបញ្ចេញឈ្មោះថា ផែនការដែលត្រូវបានគេហៅថា "ឋាននរក" នោះ នឹងរួមបញ្ចូលការកាត់ផ្តាច់ចរន្តអគ្គិសនីទាំងស្រុង ការជម្លៀសដ៏ធំ និងការវាយលុកយោធាពេញលក្ខណៈ។ ប្រភពពណ៌នាគម្រោងនោះថាជាការបង្កើនជម្លោះមិនធ្លាប់មានពីមុនមក បើប្រៀបធៀបទៅនឹងប៉ុន្មានសប្តាហ៍ ឬខែថ្មីៗនេះ។

កាសែតអ៊ីស្រាអែល Hayom បន្ថែមថា ផែនការនេះក៏ពាក់ព័ន្ធនឹងការផ្ដាច់ទឹក និងអនុវត្តការធ្វើឃាតតាមគោលដៅ ដើម្បីដាក់សម្ពាធក្រុមហាម៉ាស ឱ្យទទួលយកសំណើបទឈប់បាញ់ថ្មីរបស់អាមេរិក។

នៅព្រឹកថ្ងៃអាទិត្យ អ៊ីស្រាអែល និយាយថាខ្លួនបានយល់ព្រមលើបទឈប់បាញ់បណ្តោះអាសន្នមួយនៅហ្កាហ្សា ក្នុងអំឡុងខែតមអាហាររបស់មូស្លីមនៃបុណ្យរ៉ាម៉ាដាន និងថ្ងៃឈប់សម្រាកបុណ្យដ៏ធំរបស់ជនជាតិជ្វីហ្វ បន្ទាប់ពីសំណើរបស់ប្រេសិតពិសេសអាមេរិកប្រចាំតំបន់មជ្ឈិមបូព៌ា ជុំវិញការបន្តបទឈប់បាញ់ដំណាក់កាលទីមួយ។

នាយករដ្ឋមន្ត្រីអ៊ីស្រាអែល លោក Benjamin Netanyahu អះអាងថា ក្រុមហាម៉ាសបានបដិសេធសំណើឈប់បាញ់បណ្តោះអាសន្ននោះ ហើយបន្ទាប់មក លោកបញ្ជាឱ្យបញ្ឈប់ការផ្តល់ជំនួយមនុស្សធម៌ទៅកាន់តំបន់ហ្កាហ្សា៕