ប្រភពក្នុងស្រុក និងប្រព័ន្ធផ្សព្វផ្សាយ បានរាយការណ៍ថា ការវាយប្រហារមួយដែលត្រូវបានអះអាងដោយក្រុមសកម្មប្រយុទ្ធមានទំនាក់ទំនងជាមួយក្រុមអាល់កៃដា បានសម្លាប់ទាហាន ១១នាក់ នៅភាគខាងជើងប្រទេសនីហ្សេ ក្បែរព្រំដែនអាល់ហ្សេរី។

យោងតាមគេហទំព័រព័ត៌មាន Air Info ការល្បាតរបស់កងទ័ពមួយ ត្រូវបានពួនស្ទាក់វាយប្រហារ នៅក្នុង តំបន់ Ekade Malane កាលពីថ្ងៃសុក្រ ហើយក្រុមភេរវករ Jama'a Nusrat ul-Islam wa al-Muslimin (JNIM) បានអះអាងទទួលខុសត្រូវ។

គេហទំព័រនេះ បានបញ្ជាក់ថា ទាហាន ១១នាក់ ត្រូវបានបញ្ចុះ កាលពីថ្ងៃសៅរ៍ ដោយមានវត្តមានរបស់   មន្ត្រីជាន់ខ្ពស់ជាច្រើនរូប ក្នុងនោះ មាននាយសេនាធិការកងកម្លាំងប្រដាប់អាវុធលោកឧត្តមសេនីយ៍ Moussa Salaou Barmou។

វិទ្យុរដ្ឋបានបញ្ជាក់ពីការវាយប្រហារ និងចំនួនអ្នកស្លាប់ ប៉ុន្តែបាននិយាយថា ការល្បាតនោះ ត្រូវបានពួនស្ទាក់វាយប្រហារដោយ«ក្រុមចោរព្រៃ»។

កងកម្លាំងនីហ្សេដែលឈរជើងក្បែរប្រទេសអាល់ហ្សេរី ប្រឈមនឹងការវាយប្រហារម្តងម្កាលដោយក្រុមជនប្រដាប់អាវុធ។

ជាធម្មតា ក្រុមប្រដាប់អាវុធទាំងនេះ មិនត្រូវបានចាត់ទុកថា ជាក្រុមសកម្មប្រយុទ្ធដែលកាន់តែសកម្ម នៅក្នុងតំបន់ព្រំដែនដែលស្ថិតនៅជាប់ប្រទេសម៉ាលី និងប៊ូគីណាហ្វាសូនោះទេ។

ទោះយ៉ាងណាក៏ដោយ ភាគខាងជើងវាលខ្សាច់ដ៏ធំសម្បើមរបស់នីហ្សេ គឺជាច្រករបៀងដ៏សំខាន់សម្រាប់អ្នកជួញដូរខុសច្បាប់ និងជាចំណុចឆ្លងកាត់សម្រាប់ជនជាតិអាហ្វ្រិករាប់ពាន់នាក់ ដែលសង្ឃឹមថា នឹងទៅដល់អឺរ៉ុប។