សារព័ត៌មានអាមេរិកជាច្រើន បានរាយការណ៍កាលពីថ្ងៃអាទិត្យថា រដ្ឋមន្ត្រីការពារជាតិអាមេរិកលោក Pete Hegseth បានបញ្ជាឲ្យផ្អាករាល់ប្រតិបត្តិការតាមអ៊ីនធឺណិតរបស់ប្រទេសប្រឆាំងនឹងរុស្ស៊ី រួមទាំងសកម្មភាពវាយលុកផងដែរ។

យោងតាមសារព័ត៌មាន New York Times បានឲ្យដឹងថា ការបញ្ជានេះ គឺជាផ្នែកមួយនៃការវាយតម្លៃឡើងវិញជារួមនៃប្រតិបត្តិការរបស់សហរដ្ឋអាមេរិកប្រឆាំងនឹងទីក្រុងមូស្គូ  ដោយរយៈពេល ឬកម្រិតនៃការផ្អាកនោះ មិនច្បាស់លាស់ទេ។

មន្ទីរបញ្ចកោណ បានបដិសេធមិនធ្វើអត្ថាធិប្បាយ នៅពេលដែលត្រូវបានសួរដោយសារព័ត៌មាន AFP ។

មន្ត្រីការពារជាតិជាន់ខ្ពស់ម្នាក់ បាននិយាយថា៖«ដោយសារតែការព្រួយបារម្ភអំពីសុវត្ថិភាពប្រតិបត្តិការ យើងមិនធ្វើអត្ថាធិប្បាយ ឬពិភាក្សាអំពីការស៊ើបការណ៍សម្ងាត់តាមអ៊ីនធឺណិត ផែនការ ឬប្រតិបត្តិការនោះទេ»។

«មិនមានអាទិភាពអ្វីចំពោះលោករដ្ឋមន្ត្រី Hegseth ធំជាងសុវត្ថិភាពរបស់យោធា ក្នុងប្រតិបត្តិការទាំងអស់ ដើម្បីរួមបញ្ចូលទាំងតាមប្រព័ន្ធអ៊ីនធឺណិតផងនោះ។

ការរាយការណ៍អំពីការផ្លាស់ប្តូរនេះ កើតឡើង នៅពេលដែលប្រធានាធិបតីអាមេរិកលោក ដូណាល់ ត្រាំ (Donald Trump) បាននិងកំពុងជំរុញឲ្យមានការចរចា ដើម្បីបញ្ចប់សង្រ្គាមនៅអ៊ុយក្រែន ហើយប៉ុន្មានថ្ងៃ បន្ទាប់ពីមេដឹកនាំសហរដ្ឋអាមេរិករូបនេះ បានស្តីបន្ទោសសមភាគីអ៊ុយក្រែនរបស់ខ្លួន គឺលោក វ្ល៉ូឌីមី ហ្សេឡិនស្គី (Volodymyr Zelensky) នៅក្នុងកិច្ចប្រជុំ នៅសេតវិមាន។

បណ្តាប្រទេសលោកខាងលិច បានចោទប្រកាន់វិមានក្រឹមឡាំងថា ជាមេគំនិតនៃឧប្បត្តិហេតុដែលមានគោលបំណងព្យាយាមធ្វើឲ្យខូចការគាំទ្រសម្រាប់អ៊ុយក្រែន ខណៈដែលខ្លួនកំពុងប្រយុទ្ធប្រឆាំងនឹងការឈ្លានពានរបស់រុស្ស៊ី។