ប្រធានាធិបតីចិន លោក ស៊ី ជីនពីង (Xi Jinping) កំពុងចូលរួមកិច្ចប្រជុំនយោបាយដ៏ធំបំផុតប្រចាំឆ្នាំរបស់ប្រទេសចិន ខណៈដំណើរការសេដ្ឋកិច្ចរបស់លោក នៅទីបំផុតបានវិលមកមានភាពល្អប្រសើរវិញបន្តិចម្ដងៗ។ តែយ៉ាងណាក្ដី ការដំឡើងពន្ធរបស់ប្រធានាធិបតីអាមេរិក លោក Donald Trump នឹងសាកល្បងសមត្ថភាពរបស់ទីក្រុងប៉េកាំង ក្នុងការបន្តរក្សាសន្ទុះនោះ។

វឌ្ឍនភាព ក្នុងវិស័យបញ្ញាសិប្បនិម្មិត (AI) និងការស្វាគមន៍គាំទ្ររបស់លោក ស៊ី ចំពោះសហគ្រិនឯកជន នាពេលថ្មីៗនេះ ដូចជាលោក Jack Ma របស់ក្រុមហ៊ុន Alibaba ជាដើម បានជំរុញឲ្យភាគហ៊ុនហក់ឡើង នៅមុនកិច្ចប្រជុំរបស់សភាប្រជាជនជាតិ (NPC)។ ប៉ុន្តែសុទិដ្ឋិនិយមនោះ កំពុងត្រូវបានធ្វើឲ្យរង្គោះរង្គើរួចហើយ ដោយវិធានការដំឡើងពន្ធ ១០ភាគរយចុងក្រោយរបស់លោក Trump គ្រោងនឹងចូលជាធរមាន ពោលគឺត្រឹមតែ ១ថ្ងៃមុនពេលនាយករដ្ឋមន្ត្រីចិន លោក Li Qiang ដាក់ចេញផែននូវការសេដ្ឋកិច្ចរបស់ប្រទេសចិនសម្រាប់ឆ្នាំនេះ។

បើយោងតាមអ្នកវិភាគភាគជាច្រើន ដែលត្រូវបានសាកសួរដោយសារព័ត៌មាន Bloomberg បានឲ្យដឹងថា គណៈប្រតិភូរាប់ពាន់នាក់ ក្នុងនោះរួមទាំងប្រមុខក្រសួង និងថ្នាក់ដឹកនាំខេត្ត នឹងជួបជុំគ្នា នៅថ្ងៃទី៥ ខែមីនា ក្នុងទីក្រុងប៉េកាំង សម្រាប់សន្និបាតសភា ជាទីដែលមន្ត្រីនឹងកំណត់គោលដៅកំណើនសេដ្ឋកិច្ចប្រហែល ៥ភាគរយ។

ដើម្បីសម្រេចបានតាមការកំណត់នោះ អ្នកបង្កើតគោលនយោបាយ ត្រូវបានគេរំពឹងថា នឹងជំរុញឲ្យគោលដៅឱនភាពថវិកាផ្លូវការរបស់ចិនឡើងដល់កម្រិតខ្ពស់បំផុត ក្នុងរយៈពេលជាង ៣ទសវត្សរ៍ ដោយចាក់បញ្ចូលប្រាក់រាប់សែនកោដិយន់ទៅក្នុងប្រព័ន្ធប្រយុទ្ធនឹងបរិត្តផរណា វិស័យអចលនទ្រព្យកំពុងជាប់គាំង និងឥឡូវនេះ សង្រ្គាមពាណិជ្ជកម្មជាមួយសហរដ្ឋអាមេរិក។

រយៈពេលជិត ២ខែ ក្នុងការកាន់តំណែងប្រធានាធិបតីថ្មីរបស់លោក Trump បណ្តាប្រទេសដែលមានសេដ្ឋកិច្ចធំជាងគេលើពិភពលោក កំពុងស្ថិតនៅលើមានជម្លោះគ្នា ដែលធ្វើឲ្យវាកាន់តែមានភាពបន្ទាន់ខ្លាំងឡើងៗ ដើម្បីឲ្យបក្សកុម្មុយនីស្តបញ្ចេញលទ្ធភាពចំណាយ ចំពោះប្រជាជនរបស់ខ្លួន។ មិនដូចឆ្នាំ២០២៤ នោះទេ មានឱកាសតិចតួចដែលទីក្រុងប៉េកាំងអាចបង្កើនការនាំចេញរបស់ខ្លួន ហើយថ្នាក់ដឹកនាំ បានប្តេជ្ញាផ្តល់អាទិភាពដល់ការពង្រីកតម្រូវការក្នុងស្រុក៕