ប្រធានាធិបតីបារាំង លោក Emmanuel Macron កាលពីថ្ងៃអាទិត្យ (ទី២ ខែមីនា) បានប្រាប់សារព័ត៌មាន Le Figaro ថា ប្រទេសបារាំង និងអង់គ្លេស កំពុងស្នើឲ្យមានបទឈប់បាញ់ដោយផ្នែកខ្លះរយៈពេល ១ខែ រវាងរុស្ស៊ី និងអ៊ុយក្រែន ដែលមិនគ្របដណ្តប់លើការប្រយុទ្ធគ្នា នៅផ្លូវគោក។

តែទោះបីជាយ៉ាងណាក្ដី លោក Macron បាននិយាយថា បទឈប់បាញ់ នឹងគ្របដណ្តប់លើការវាយប្រហារតាមផ្លូវអាកាស ផ្លូវទឹក និងហេដ្ឋារចនាសម្ព័ន្ធថាមពល។

លោក Macron បានប្រាប់សារព័ត៌មាន Le Figaro ថា «ក្នុងករណីមានបទឈប់បាញ់ វាពិតជាលំបាកណាស់ ក្នុងការផ្ទៀងផ្ទាត់ថា តើការប្រយុទ្ធគ្នា នៅតាមសមរភូមិជួរមុខ ត្រូវបានគោរព ឬអត់នោះ» ដោយលោកបានបន្ថែមថា ខ្សែត្រៀមជួរមុខ គឺស្មើនឹងចម្ងាយ រវាងទីក្រុងប៉ារីស និងទីក្រុង Budapest។

លោក Macron បាននិយាយទៅកាន់សារព័ត៌មាន Le Figaro នៅពេលលោកឡើងយន្តហោះធ្វើដំណើរទៅកាន់ទីក្រុងឡុងដ្រ៍ ដើម្បីចូលរួមកិច្ចប្រជុំជាមួយបណ្ដាមេដឹកនាំអឺរ៉ុប ដែលត្រូវបានកោះអញ្ជើញដោយនាយករដ្ឋមន្ត្រីអង់គ្លេស លោក Keir Starmer ដើម្បីជំរុញដល់កិច្ចប្រឹងប្រែង ក្នុងការបង្កើតផែនការសន្តិភាព នៅប្រទេសអ៊ុយក្រែន។

កិច្ចប្រជុំកំពូល នៅទីក្រុងឡុងដ្រ៍នេះ បានកើតមានឡើង ២ថ្ងៃបន្ទាប់ពីកិច្ចប្រជុំរបស់ប្រធានាធិបតីអ៊ុយក្រែនលោក Volodymyr Zelensky ជាមួយប្រធានាធិបតីអាមេរិកលោក Donald Trump នៅសេតវិមាន បានបញ្ចប់ទៅប្រកបដោយភាពមួហ្មង។ បណ្ដាមេដឹកនាំពិភពលោក បានបង្ហាញការគាំទ្រយ៉ាងខ្លាំងដល់មេដឹកនាំអ៊ុយក្រែន ហើយសន្យាថា នឹងធ្វើកិច្ចការបន្ថែមទៀត ដើម្បីជួយគាំទ្រប្រទេសរបស់លោក៕