ឯកអគ្គរដ្ឋទូតចិនប្រចាំប្រទេសអូស្ត្រាលី បានព្រមានថា ការសម្រេចហាមឃាត់កម្មវិធីបច្ចេកវិទ្យាបញ្ញាសិប្បនិម្មិត DeepSeek ពីប្រព័ន្ធ និងឧបករណ៍របស់រដ្ឋាភិបាល បង្កហានិភ័យបន្ថែមទៀតដល់ទំនាក់ទំនងពាណិជ្ជកម្ម និងបច្ចេកវិទ្យា រវាងប្រទេសទាំង២ ដែលទើបតែមានស្ថិរភាពទំនាក់ទំនងទ្វេភាគី នាពេលថ្មីៗនេះ។

ការអត្ថាធិប្បាយរបស់ឯកអគ្គរដ្ឋទូត Xiao Qian បានកើតឡើងនៅពេលដែលក្រុមការងារកងទ័ពជើងទឹកចិន បានធ្វើដំណើរក្បែរដែនទឹករបស់អូស្ត្រាលី ដែលជាផែនការជាក់ស្តែងមួយ ក្នុងការធ្វើចរាចរណ៍នាវា ជុំវិញប្រទេសកោះនេះ។ នាវាចម្បាំង កាលពី ១០ថ្ងៃមុន បានធ្វើសមយុទ្ធបាញ់គ្រាប់ពិត នៅសមុទ្រ Tasman រវាងអូស្ត្រាលី និងនូវែលសេឡង់។

ដោយសរសេរនៅក្នុងអត្តបទសារព័ត៌មានរបស់សារព័ត៌មាន The Australian នាថ្ងៃចន្ទ (ទី៣ ខែមីនា) លោក Xiao បានលើកឡើងថា កម្មវិធី AI ដែលបង្កើតឡើងដោយប្រទេសចិន នឹង «ផ្តល់ផលប្រយោជន៍យ៉ាងច្រើនដល់ពិភពលោក ក្នុងទិដ្ឋភាពផ្សេងៗ» ហើយបានជំរុញឲ្យអូស្ត្រាលីធ្វើការជាមួយទីក្រុងប៉េកាំង ដើម្បីរួមគ្នាអភិវឌ្ឍបច្ចេកវិទ្យាថ្មីៗនេះ។

លោកឯកអគ្គរដ្ឋទូតរូបនេះ បានរៀបរាប់នៅក្នុងអត្ថបទរបស់លោកថា៖ «ការចាត់វិធានការតឹងរ៉ឹងប្រឆាំងនឹងកម្មវិធីនេះ ក្រោមលេស «ហានិភ័យសុវត្ថិភាព» គឺជាការប៉ុនប៉ង ដើម្បីពង្រីកគំនិតនៃសន្តិសុខជាតិ និងធ្វើនយោបាយលើបញ្ហាពាណិជ្ជកម្ម និងបច្ចេកវិទ្យា»។

គួររំលឹកថា កាលដើមខែកុម្ភៈ រដ្ឋាភិបាលដឹកនាំដោយគណបក្សកណ្តាលនិយមឆ្វេងនិយមរបស់ប្រទេសអូស្ត្រាលី គឺគណបក្សកាងារ បានក្លាយជាប្រទេសមួយ ក្នុងចំណោមប្រទេសដំបូងគេ នៅលើពិភពលោកដែលហាមឃាត់កម្មវិធីបច្ចេកវិទ្យា DeepSeek ពីឧបករណ៍ផ្លូវការ ជាការសម្រេចដែលខ្លួនបានផ្ដល់ហេតុផលពីបញ្ហាសន្តិសុខជាតិ៕