ប្រទេសកូរ៉េខាងត្បូង បានរងគ្រោះដោយភ្លៀង និងព្រិលធ្លាក់ខ្លាំង ចាប់ពីយប់ថ្ងៃទី២ ដល់ថ្ងៃទី៣ ខែមីនា ដោយបានបង្កជាការរំខានដល់ការធ្វើដំណើរ និងក្ដីបារម្ភ អំពីសុវត្ថិភាព ខណៈមានការព្យាករណ៍ អំពីការធ្លាក់ព្រិល និងភ្លៀងបន្ថែម នៅទូទាំងប្រទេស ចាប់ពីថ្ងៃអង្គារ (ទី៤ ខែមីនា)។

យោងតាមរដ្ឋបាលឧតុនិយមកូរ៉េ បានឲ្យដឹងថា ព្រិលធ្លាក់ខ្លាំងត្រូវបានគេសង្កេតឃើញមានពេញមួយយប់ នៅក្នុងទីក្រុងសេអ៊ូល និងខេត្តចំនួន៣ ផ្សេងទៀត គឺ Gyeonggi, Gangwon និង Chungcheong។

ភ្លៀងធ្លាក់ខ្លាំង នៅថ្ងៃចន្ទ (ទី៣ ខែមីនា) នេះ បណ្តាលឲ្យកើតមានឧបទ្ទវហេតុជាច្រើន នៅទូទាំងប្រទេស បើទោះបីមិនមានអ្នករងរបួស ឬស្លាប់ក៏ដោយ គិតត្រឹមម៉ោង ១១ព្រឹក។ មន្ត្រីទទួលបានសេចក្ដីរាយការណ៍ចំនួន៤ ពាក់ព័ន្ធនឹងរថយន្តជាច្រើនគ្រឿងជាប់នៅនឹងកន្លែង ហើយមនុស្ស ១០នាក់ ត្រូវបានជួយសង្គ្រោះ។ គ្រោះថ្នាក់ចរាចរណ៍ ១១ករណី ក៏ត្រូវបានរាយការណ៍ផងដែរ ហើយរបាយការណ៍សុវត្ថិភាពបន្ថែមចំនួន ៥១ច្បាប់ ត្រូវបានដាក់ជូនទៅមន្ត្រី ពាក់ព័ន្ធនឹងការមានគំនរព្រិលខ្ពស់ឡើងៗ។

គិតត្រឹមម៉ោង ១១ព្រឹក សេវាស្រឡាងចំនួន ៥៣គ្រឿង ត្រូវបានលុបចោល ហើយជើងហោះហើរចំនួន ១០វ៉ុល នៅតែផ្អាកដដែល។ ឧទ្យានជាតិចំនួន ១៣កន្លែង នៅតែបិទជាសាធារណៈ ខណៈដែលរថយន្ត មិនត្រូវបានអនុញ្ញាតឲ្យប្រើប្រាស់ផ្លូវចំនួន ១៣ខ្សែ ដើម្បីការពារកុំឲ្យកើតមានឧប្បត្តិហេតុសុវត្ថិភាពបន្ថែមទៀត៕