ឯកអគ្គរដ្ឋទូតទីក្រុងម៉ានីល ប្រចាំនៅសហរដ្ឋអាមេរិក នៅថ្ងៃចន្ទ (ទី៣ ខែមីនា) នេះ បានប្រាប់ឲ្យដឹងថា កិច្ចព្រមព្រៀងការពារជាតិដែលមានស្រាប់ រវាងសម្ព័ន្ធមិត្តសន្តិសុខ ហ្វីលីពីន និងសហរដ្ឋអាមេរិក នឹងនៅតែមានអ្វីប៉ះពាល់ដដែល ក្រោមការដឹកនាំរបស់ប្រធានាធិបតីអាមេរិក លោក Donald Trump។

សហរដ្ឋអាមេរិក និងហ្វីលីពីន ដែលជាអតីតប្រទេសក្រោមអាណានិគមរបស់ខ្លួន គឺជាសម្ព័ន្ធមិត្តការពារជាតិដ៏រឹងមាំ ដោយមានការឆា្លស់ចុះឡើងជាទៀងទាត់នូវកងទ័ពអាមេរិកចូល និងចេញ នៅប្រទេសអាស៊ីអាគ្នេយ៍ និងសមយុទ្ធរួមគ្នារាប់សិបដង ដែលធ្វើឡើងជារៀងរាល់ឆ្នាំ។

ដោយនិយាយនៅខាងក្រៅវេទិកាមួយ ជាមួយប្រព័ន្ធផ្សព្វផ្សាយបរទេស នៅទីក្រុងម៉ានីល លោក Jose Manuel Romualdez បានបញ្ជាក់ថា៖ «អ្វីៗទាំងអស់ នឹងនៅតែមានដដែល»។

លោក Romualdez កំពុងឆ្លើយតបទៅនឹងសំណួរ អំពីការគាំទ្រផ្នែកសន្តិសុខរបស់សហរដ្ឋអាមេរិក ចំពោះហ្វីលីពីន រាប់ចាប់ពីការផ្តល់ហិរញ្ញប្បទានយោធា និងការល្បាត នៅសមុទ្រចិនខាងត្បូង រហូតដល់ការប្រើប្រាស់កន្លែងការពារជាតិរបស់ប្រទេសហ្វីលីពីនពីសំណាក់កងកម្លាំងអាមេរិក ក្រោមកិច្ចព្រមព្រៀងសម្ព័ន្ធមិត្តរបស់ប្រទេសទាំង២។

លោក Romualdez បានបន្ថែមថា ប្រធានាធិបតីហ្វីលីពីន លោក Ferdinand Marcos Jr បានត្រៀមរួចជាស្រេច ក្នុងការធ្វើដំណើរទៅសហរដ្ឋអាមេរិក នៅពេលដែលលោក Trump មានពេលវេលាសម្រាប់កិច្ចប្រជុំ ដែលអាចនឹងមាននៅនិទាឃរដូវ៕