ក្រសួងសង្គ្រោះបន្ទាន់របស់រុស្ស៊ី បានឲ្យដឹងថា អគ្គិភ័យដែលបានឆាបឆេះ នៅថ្ងៃចន្ទ (ទី៣ ខែកុម្ភៈ) នៅឯរោងចក្រចម្រាញ់ប្រេង ក្នុងតំបន់ Ufimsky ដែលជារោងចក្រដ៏ធំបំផុតមួយរបស់រុស្ស៊ី គឺដោយសារតែបញ្ហាបច្ចេកទេស ខណៈត្រូវបានពន្លត់ទាំងស្រុងហើយ ដោយបានបន្ថែមថា រោងចក្រនេះ បានបន្តប្រតិបត្តិការ។

គេមិនទាន់ដឹងច្បាស់នៅឡើយទេថា តើទិន្នផលត្រូវបានបញ្ឈប់នៅត្រង់ចំណុចណា ដោយសារអគ្គិភ័យនេះ។ អ្នកនាំពាក្យរបស់ក្រុមហ៊ុន Bashneft បានប្រាប់សារព័ត៌មាន Interfax ថា អគ្គិភ័យនេះមិនបានប៉ះពាល់ដល់កន្លែងផលិតសំខាន់ៗទេ។

ទិន្នន័យពីក្រុមហ៊ុន LSEG បង្ហាញថា រោងចក្រចម្រាញ់ប្រេងគ្រប់គ្រងដោយក្រុមហ៊ុន Bashneft ដែលមានចម្ងាយប្រហែល ១.៥០០គីឡូម៉ែត្រ ភាគខាងកើតនៃព្រំដែនជាមួយប្រទេសអ៊ុយក្រែន មានសមត្ថភាពផលិតប្រេង ១៦៨.០០០បារ៉ែល ក្នុងមួយថ្ងៃ ហើយការផ្គត់ផ្គង់ប្រេងរបស់រៀងចក្រនេះ ភាគច្រើនមកពីជុំវិញតំបន់ Bashkiria និងភាគខាងលិចតំបន់ស៊ីបេរី។

ដោយដកស្រង់ពីការរកឃើញបថម ក្រសួងសង្គ្រោះបន្ទាន់ ក្នុងតំបន់ បានឲ្យដឹងនៅលើកម្មវិធីផ្ញើសារ Telegram ថា «អគ្គិភ័យនេះ គឺទាក់ទងទៅនឹងបញ្ហាបច្ចេកទេស» ហើយបានចាប់ផ្ដើមឆាបឆេះចេញពីកន្លែងក្បែរឡកម្ដៅ។

វីដេអូមួយដែលត្រូវបានបង្ហោះនៅលើបណ្ដាញសង្គម និងផ្ទៀងផ្ទាត់ដោយសារព័ត៌មាន Reuters បានបង្ហាញថា រោងចក្រចម្រាញ់ប្រេងនៅទីក្រុង Ufa ដែលជាទីក្រុងធំជាងគេនៅតំបន់ Bashkortostan កំពុងត្រូវបានអណ្ដាតភ្លើងឆាបឆេះ។ តែយ៉ាងណាក្ដី កាលបរិច្ឆេទនៃរូបភាពវីដេអូនោះ មិនអាចត្រូវបានបញ្ជាក់ភ្លាមៗឡើយ៕