ក្រសួងការពារជាតិរុស្ស៊ី និយាយនៅព្រឹកថ្ងៃចន្ទនេះថា កងកម្លាំងអវកាសរុស្ស៊ីដែលជាផ្នែកមួយនៃកងកម្លាំងប្រដាប់អាវុធរុស្ស៊ី បានបាញ់បង្ហោះយានចម្លង Soyuz ពាំយានអវកាសសម្រាប់គោលបំណងការពារជាតិ ។

ទីភ្នាក់ងារព័ត៌មានរដ្ឋរុស្ស៊ី RIA បានរាយការណ៍ដោយពុំបានបរិយាយថា យានចម្លង Soyuz-2.1b បានហោះចេញពីមជម្ឈមណ្ឌលអវកាស Plesetsk Cosmodrome ស្ថិតនៅតំបន់ Arkhangelsk ភាគខាងជើងប្រទេសរុស្ស៊ី ។

កងកម្លាំងអវកាស បានបាញ់បង្ហោះដោយជោគជ័យយានចម្លង Soyuz-2.1b ពាំយានអវកាសទៅកាន់តារាវិថី ដែលជាប្រយោជន៍ដល់ក្រសួងការពារជាតិរុស្ស៊ី ។

ការបាញ់បង្ហោះយានចម្លង Soyuz របស់រុស្ស៊ី ចំាបាច់សម្រាប់បេសកកម្មនៅទីអវកាស រួមទាំងការនាំយកសម្ភារៈ និងអវកាសយានិកទៅកាន់ស្ថានីយ៍អវកាសអន្តរជាតិ(ISS) ។

យោងតាមការអះអាងរបស់ទីភ្នាក់ងារអឺរ៉ុប បានឲ្យដឹងថា យានចម្លង Soyuz ជិត ១.៧០០គ្រឿង ត្រូវបានបាញ់បង្ហោះគិតមកទល់នឹងពេលនេះ ។

សូមបញ្ជាក់ថា ការបាញ់បង្ហោះយានចម្លង Soyuz សម្រាប់គោលបំណងវិទ្យាសាស្រ្ត និងរុករក ជាធម្មតាត្រូវបានប្រកាសឲ្យដឹងដោយទីភ្នាក់ងារអវកាស Roscosmos របស់រុស្ស៊ី ៕