នាយករដ្ឋមន្ត្រីហុងគ្រី លោក Viktor Orban បាននិយាយថា លទ្ធផលនៃកិច្ចប្រជុំរបស់មេដឹកនាំនៃបណ្តាប្រទេសអឺរ៉ុបមួយចំនួន នៅទីក្រុងឡុងដ៍ គឺមានគ្រោះថ្នាក់ ដោយសារតែពួកគេ បានសម្រេចចិត្តបន្តជម្លោះក្នុងប្រទេសអ៊ុយក្រែន និងជំរុញប្រទេសនេះ។

លោក Orban បានសរសេរនៅលើទំព័រ X របស់ខ្លួនថា៖«មេដឹកនាំអឺរ៉ុប បានសម្រេចចិត្ត នៅទីក្រុងឡុងដ៍កាលពីថ្ងៃអាទិត្យថា ពួកគេចង់បន្តសង្រ្គាមជាជាងជ្រើសរើសសន្តិភាព។ ពួកគេបានសម្រេចចិត្តថា អ៊ុយក្រែន ត្រូវតែបន្តសង្រ្គាម។ នេះ គឺអាក្រក់ គ្រោះថ្នាក់ និងមានកំហុស។ ប្រទេសហុងគ្រី នៅតែនៅខាងសន្តិភាព»។  

លោកនាយករដ្ឋមន្ត្រីហុងគ្រី មិនត្រូវបានអញ្ជើញឲ្យចូលរួមកិច្ចប្រជុំកំពូល កាលពីថ្ងៃអាទិត្យ នៅទីក្រុងឡុងដ៍ ជាកន្លែងដែលការបន្តជំនួយយោធាដល់ក្រុងគីវ ត្រូវបានពិភាក្សា។ រដ្ឋមន្ត្រីការបរទេសលោក Peter Szijjarto បាននិយាយថា ប្រទេសហុងគ្រី នឹងមិនទៅទីនោះទេ ព្រោះមានតែអ្នកគាំទ្រនៃការបន្តនៃអរិភាពប៉ុណ្ណោះ ដែលគ្រោងនឹងជួបនៅទីនោះ។ លោក Szijjarto បានបញ្ជាក់ថា ផ្ទុយទៅវិញ ប្រទេសហុងគ្រី   គាំទ្រការចរចាររវាងរុស្ស៊ី និងអាមេរិក ដែលគួរតែឈានទៅដល់ការដោះស្រាយជម្លោះអ៊ុយក្រែន ដោយសន្តិវិធី។

កិច្ចប្រជុំនៅទីក្រុងឡុងដ៍ មានការចូលរួមពីមេដឹកនាំនៃប្រទេសអាល្លឺម៉ង់ ដាណឺម៉ាក អេស្ប៉ាញ អ៊ីតាលី ហូឡង់ ន័រវែស ប៉ូឡូញ រូម៉ានី ហ្វាំងឡង់ បារាំង សាធារណរដ្ឋឆេក ស៊ុយអែត ក៏ដូចជាប្រធានគណៈកម្មការអឺរ៉ុបលោកស្រី Ursula von der Leyen ប្រធានក្រុមប្រឹក្សាអឺរ៉ុបលោក Antonio Costa និងអគ្គលេខាធិការអង្គការណាតូលោក Mark Rutte ។ នាយករដ្ឋមន្រ្តីកាណាដា Justin Trudeau និង Vladimir Zelensky ក៏ត្រូវបានអញ្ជើញឲ្យចូលរួមក្នុងកិច្ចប្រជុំកំពូលនេះ ផងដែរ។