រយៈពេលប៉ុន្មានខែមុនពេលក្លាយជាអធិការបតីនៃប្រទេសអូទ្រីស នាថ្ងៃចន្ទ (ទី៣ ខែមីនា) នេះ លោក Christian Stocker គឺជាមន្ត្រីគណបក្សដែលមិនមានបទពិសោធន៍ក្នុងតំណែងរដ្ឋមន្ត្រី ជិតដល់អាយុចូលនិវត្តន៍យ៉ាងឆាប់រហ័ស ហើយស្ទើរតែត្រូវបានគេស្គាល់ថា ស្ថិតនៅខាងក្រៅរង្វង់នយោបាយ។

ប៉ុន្តែរយៈពេល ៥ខែនៃកិច្ចពិភាក្សាបង្កើតរដ្ឋាភិបាលចម្រុះដ៏ច្របូកច្របល់បំផុត នៅក្នុងប្រវត្តិសាស្ត្រក្រោយសង្រ្គាមរបស់ប្រទេសនេះ បន្ទាប់ពីមាននូវការបោះឆ្នោតដ៏តានតឹង ក្នុងខែកញ្ញាឆ្នាំមុន បាននាំឲ្យបុរសវ័យ ៦៤ឆ្នាំដែលមិនសូវល្បីឈ្មោះ ត្រូវបានស្បថចូលកាន់តំណែងជាប្រមុខរដ្ឋាភិបាល។

សារព័ត៌មាន Kronen Zeitung នៅអូទ្រីស បានដាក់ចំណងព័ត៌មានធំពីលោក Stocker ថ្មីៗនេះថា៖ «អធិការបតី (ដែលនឹងត្រូវចូលកាន់តំណែងឆាប់ៗនេះ) មិនសូវមានគេស្គាល់ឈ្មោះ»។

នៅពេលដែលទាំងក្រុមអភិរក្សនិយមរបស់លោក គឺគណបក្សប្រជាជន (OVP) និងក្រុមស្តាំនិយមជ្រុល គឺគណបក្សសេរីភាព (FPO) បានធ្វើឲ្យខូចឱកាសរបស់ពួកគេ ដើម្បីបានដឹកនាំរដ្ឋាភិបាលមួយ លោក Stocker ត្រូវបានរុញឲ្យចូលទៅអង្គុយក្នុងក៏អីកំពូលរបស់ប្រទេសយ៉ាងឆាប់រហ័ស ដោយបានឈានដល់កិច្ចព្រមព្រៀងបង្កើតរដ្ឋាភិបាលចម្រុះក្រុមកណ្តាលនិយមដែលអ្នកស្នងតំណែងមុនរបស់លោក បានបរាជ័យមិនអាចសម្រេចបាន។

លោក Stocker ដែលជាមេធាវីដ៏ស្មោះត្រង់ និងមានហេតុផល បានប្រឹងប្រែងបន្តធ្វើឲ្យប្រទេសអូទ្រីសដែលមានទំនោរស្តាំនិយមកាន់តែខ្លាំងឡើង ស្ថិតនៅក្នុងរង្វង់សហភាពអឺរ៉ុប និងរិះគន់រុស្ស៊ី ពោលគឺខុសពីមេដឹកនាំរបស់គណបក្ស FPO គឺលោក Herbert Kickl ដែលឥឡូវនេះ នៅតែជាអ្នកប្រឆាំង៕