សេចក្ដីព្រាងមួយច្បាប់ដែលមើលឃើញដោយសារព័ត៌មានរ៉យទ័របានបង្ហាញថា អេហ្ស៊ីប បានបង្កើតផែនការថ្មីមួយសម្រាប់តំបន់ហ្កាហ្សា ជាការប្រឆាំងតបទៅនឹងមហិច្ឆិតារបស់លោកប្រធានាធិបតីអាមេរិក Donald Trump ដែលចង់បង្កើត "តំបន់ឆ្នេរលំហែមជ្ឈិមបូព៌ា" ហើយគម្រោងនោះនឹងដកក្រុមហាម៉ាសចេញពីដែនដីហ្កាហ្សា និងជំនួសដោយស្ថាប័នបណ្តោះអាសន្នដែលគ្រប់គ្រងដោយរដ្ឋអារ៉ាប់ មូស្លីម និងលោកខាងលិច។

ចក្ខុវិស័យរបស់អេហ្ស៊ីប សម្រាប់តំបន់ហ្កាហ្សា នឹងត្រូវបង្ហាញឡើងនៅក្នុងកិច្ចប្រជុំកំពូលសម្ព័ន្ធអារ៉ាប់នៅថ្ងៃអង្គារ (០៤ មីនា) នេះ ប៉ុន្តែមិនបានបញ្ជាក់ថា តើសំណើនេះនឹងត្រូវអនុវត្តមុន ឬក្រោយកិច្ចព្រមព្រៀងសន្តិភាពអចិន្ត្រៃយ៍ណាមួយទេ ដើម្បីបញ្ចប់សង្រ្គាមដែលបង្កឡើងដោយការវាយប្រហារកាលពីថ្ងៃទី០៧ ខែតុលា ឆ្នាំ២០២៣ របស់ក្រុមហាម៉ាស។

គួរបញ្ជាក់ថា ផែនការរបស់លោក Trump ដែលស្នើចង់បោសសម្អាតប្រជាជនប៉ាឡេស្ទីននៅតំបន់ហ្កាហ្សា ហាក់ដូចជាងាកចេញពីគោលនយោបាយមជ្ឈិមបូព៌ាដ៏យូរអង្វែងរបស់អាមេរិក ដែលផ្តោតលើដំណោះស្រាយរដ្ឋពីរ ហើយបង្កកំហឹងយ៉ាងខ្លាំងក្នុងចំណោមប្រជាជនប៉ាឡេស្ទីន និងប្រទេសអារ៉ាប់។

ផែនការរបស់ទីក្រុងគែរ មិនដោះស្រាយបញ្ហាសំខាន់ៗដូចជា ថាតើអ្នកណានឹងដាក់ច្បាប់សម្រាប់ការកសាងឡើងវិញរបស់ហ្កាហ្សា ឬគូសបញ្ជាក់លម្អិតណាមួយអំពីវិធីសាស្រ្តដែលហ្កាហ្សានឹងត្រូវបានគ្រប់គ្រង និងថាតើក្រុមប្រដាប់អាវុធដែលមានអំណាចធំដូចក្រុមហាម៉ាសនេះ នឹងត្រូវបានរុញទៅម្ខាងដោយរបៀបណាទេ៕