​បាល់ទាត់៖ ​អ្នកចាត់ការ​ក្រុម​ជំរើសជាតិ​អង់គ្លេស​លោក Gareth Southgate បាន​ចុះហត្ថលេខា​លើ​កិច្ចសន្យា​ដែល​នឹង​បន្ត​ដឹកនាំ​អង់គ្លេស​ដល់​ឆ្នាំ​២០២៤​។ ​បុរស​វ័យ ៥១​ឆ្នាំ​រូប​នេះ​បាន​ចូល​មក​កាន់​តំណែង​ដឹកនាំ​អង់គ្លេស​តាំងពី​ឆ្នាំ២០១៦ ខែ​វិច្ឆិកា ខណៈ​កិច្ចសន្យា​ចាស់​របស់លោក​ត្រូវអស់​សុពលភាព​នៅ​ឆ្នាំ២០២២ ក្រោយ World Cup នៅ​កាតា​។

​​លោក Southgate បាន​ដឹកនាំ​អង់គ្លេស​ឡើងដល់​វគ្គ​ផ្តាច់ព្រ័ត្រ Euro ២០២០ ដែលជា​ស្ថិតិ​ល្អ​បំផុត​របស់​អង់គ្លេស​ក្នុង​រយៈពេល ៥៥ឆ្នាំ​។ អង់គ្លេស​បាន​ធានា​កៅអី​នៅ World Cup ២០២២ ប្រទេស​កាតា​ហើយ​ក្នុងនាម​ជា​ក្រុម​លេខ ១ ក្នុង​ពូ​ល​នៃ​វគ្គ​ជំ​រុះ​។ ​រំលឹកថា ​លោក Gareth Southgate បានមក​កាន់​តំណែង​ដឹកនាំ​អង់គ្លេស​បណ្តោះអាសន្ន​នៅ​ខែកញ្ញា​ ឆ្នាំ​២០១៦ បន្ត​ពី​លោក Sam Allardyce មុន​ពេល​ដែល​ទទួលបាន​តំណែង​ដឹកនាំ​ផ្លូវការ​នៅ​ពីរ​ខែ​បន្ទាប់​។

មុន​ដល់វគ្គ​ផ្តាច់ព្រ័ត្រ Euro ២០២០ កាល​ពី​ខែកក្កដា​ដែល​ចាញ់​អ៊ីតាលី​នោះ អង់គ្លេស​កាលពី​ឆ្នាំ២០១៨ ក៏បាន​ឡើង​ដល់​វគ្គ​ពាក់​កណ្តាល​ផ្តាច់ព្រ័ត្រ World Cup នៅ​រុស្ស៊ី​ជា​លើកដំបូង​ក្នុង​រយៈពេល ២៨ឆ្នាំ​ផងដែរ​។ ​​ក្រោម​ការដឹកនាំ​របស់ Southgate អង់គ្លេស​លេង​សរុប ៦៨ប្រកួត​ឈ្នះ ៤៤ប្រកួត ​ស្មើ ១០ប្រកួត ​ចាញ់ ១៤។ ​ប្រាក់ខែ​របស់លោក Gareth Southgate មិនត្រូវ​បាន​គេ​បញ្ចេញ​ឡើយ តែ​ប្រភពព័ត៌មាន​នៅ​អង់គ្លេស​បាន​ចុះផ្សាយ​ថា​ ក្នុង​ចន្លោះ ៥ ទៅ ៦លាន​ផោន​ក្នុង​មួយឆ្នាំ​៕

​អត្ថបទ​៖​នាង សុភា​វុ​ធ