​អេ​ត្យូ​ពី​៖ រដ្ឋាភិបាល​របស់​ប្រទេស​អេ​ត្យូ​ពី​កំពុង​លើកទឹកចិត្ត​ស្ត្រី​ ឱ្យ​ជួយ​គាំទ្រ​ដល់​កិច្ច​ខិតខំ​ប្រឹងប្រែង​ក្នុង​សង្គ្រាម​ដោយ​ការ​បរិច្ចាគ​ប្រាក់ អាហារ ពេលវេលា និង​សូម្បីតែ​ឈាម​របស់​ពួកគេ​។​ ស្ត្រី​កំពុង​ប្រមូល​ផ្ដុំគ្នា​ដោយ​សែង​បាវ​ស្បៀងអាហារ​ដ៏​ធ្ងន់​ ដែល​បាន​បរិច្ចាគ​ពី​អ្នកជិតខាង​ក្នុង​តំបន់​របស់​ពួកគេ​។​

​អ្នក​ខ្លះ​ទៀត​មក​ជួយ​ហាល​ស្រូវ​សាលី និង​តម្រៀប​អាហារ​សម្រាប់​ដឹកជញ្ជូន​ទៅ​ឲ្យ​ទាហាន​ ដែល​កំពុង​ជាប់ដៃ​ប្រយុទ្ធ​នៅ​សមរភូមិ​ជួរមុខ​។​ អ្នកស្រី Lomi Bekele ជា​អ្នកគាំទ្រ​រដ្ឋាភិបាល​ដែល​បាន​លះបង់​ពេលវេលា​ ជួយ​ប្រទេស​នេះ​បាន​និយាយ​ថា យើង​កំពុង​ធ្វើ​គ្រប់យ៉ាងដែល​យើង​អាច​ធ្វើ​បាន​ជួយ​ដល់​ទាហាន​រដ្ឋាភិបាល​។ យើង​កំពុង​រៀបចំ​ស្រូវ​សាលី។ ​យើង​ក៏​កំពុង​បរិច្ចាគ​ឈាម​ដល់​យោធា​ផង​ដែរ​។ យើង​ក៏​កំពុង​បរិច្ចាគ​ប្រាក់​របស់​យើង​ដើម្បី​បុព្វហេតុ​នេះ​ដែរ​»​។​ គិលានុបដ្ឋាយិកា​នៅ​ក្បែរ​នោះ​បាន​ជួយ​មនុស្ស​ ក្នុង​ការ​ទទួលយក​ឈាម​ពីអ្នកស្ម័គ្រចិត្ត​សម្រាប់​ទាហាន​ដែល​រង​របួស​។

​អ្នកស្រី Etaferahu Tekalegn ជា​ម្ដាយ​មាន​កូន ៣​នាក់ដែល​មក​រៀបចំ​ស្បៀងអាហារ​ជូន​ដល់​ទាហាន និង​មានឱកាស​បរិច្ចាគ​ឈាម​ផង​ដែរ​នោះ​បាន​និយាយ​ថា ខ្ញុំ​ធ្វើ​រឿង​នេះ ព្រោះ​ខ្ញុំ​ចង់​ជួយ​ទាហាន​រដ្ឋាភិបាល​ដែល​បាន​រង​របួស​។​ បេសកជន​ពិសេស​របស់​សហរដ្ឋអាមេរិក​សម្រាប់​តំបន់​ញ៉​ក​អាហ្វ្រិក លោក Jeffrey Feltman ត្រូវ​បាន​បដិសេធ​ដោយ​នាយករដ្ឋមន្ត្រី Abiy Ahmedr ក្នុង​ការ​អំពាវនាវ​ឱ្យ​បញ្ចប់​ការ​បិទ​ផ្លូវ​មនុស្សធម៌​នៃ​តំបន់ Tigray ភាគ​ខាងជើងជា​ជម្រក​របស់​ក្រុម​ឧទ្ទាម​ ដែល​ឥឡូវនេះ​កំពុង​វាយ​រុល​ទៅ​មុខ​ឆ្ពោះ​ទៅ​កាន់​រដ្ឋធានី​របស់​ប្រទេស​មួយ​នេះ​៕

អត្ថបទ៖ សុខមាន