អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei កាលពីថ្ងៃចន្ទ បានរិះគន់នូវអ្វីដែលលោកបានចាត់ទុកថា ជាការអះអាង«មិនពិត» ធ្វើឡើងដោយទីភ្នាក់ងារថាមពលអាតូមិកអន្តរជាតិ (IAEA) និងអគ្គនាយករបស់ទីភ្នាក់ងារ លោក Rafael Grossi ទាក់ទងនឹងលក្ខណៈនៃកម្មវិធីនុយក្លេអ៊ែរដោយ «សន្តិវិធី» របស់ប្រទសអ៊ីរ៉ង់។

លោក Baghaei បាននិយាយដូច្នេះក្នុងអំឡុងសន្និសីទសារព័ត៌មានប្រចាំសប្តាហ៍នៅទីក្រុងតេអេរ៉ង់ ដោយឆ្លើយតបទៅនឹងរបាយការណ៍របស់ទីភ្នាក់ងារ IAEA នាពេលថ្មីៗនេះ ដែលបានបញ្ជាក់ថា អ៊ីរ៉ង់បាន «បង្កើនយ៉ាងខ្លាំង» ក្នុងការផលិតអ៊ុយរ៉ានីញ៉ូមដែលចម្រាញ់ខ្ពស់របស់ខ្លួន ចាប់តាំងពីខែធ្នូ ដោយបង្កើនការស្តុកទុកសម្ភារៈជិតដល់កម្រិតផលិតអាវុធ។ លោក Grossi ក៏បានធ្វើការអត្ថាធិប្បាយស្រដៀងគ្នាលើបញ្ហានេះ ផងដែរ។

លោក Baghaei និយាយថា ទីក្រុងតេអេរ៉ង់ រំពឹងថាប្រមុខទីភ្នាក់ងារ IAEA នឹងមានចំណាត់ការក្នុងក្របខ័ណ្ឌនៃសិទ្ធិអំណាច និងភារកិច្ចរបស់លោក ដោយបញ្ជាក់ថាការសន្និដ្ឋានផ្នែកនយោបាយ ពុំមែនជាផ្នែកនៃទំនួលខុសត្រូវរបស់លោក Grossi ហើយក៏មិនជួយដោះស្រាយក្តីបារម្ភអំពីកម្មវិធីនុយក្លេអ៊ែររបស់អ៊ីរ៉ង់ នោះដែរ។

លោកបាននិយាយបន្ថែមថា «សេចក្តីថ្លែងការណ៍បែបនេះ ពុំមែនជាវិធីដែលផ្អែកលើការពិតនោះទេ» ហើយកម្មវិធីនុយក្លេអ៊ែររបស់អ៊ីរ៉ង់ ត្រូវបានបញ្ជាក់ដដែលៗថា ស្ថិតនៅក្នុងក្របខ័ណ្ឌនៃច្បាប់អន្តរជាតិ ការពារកិច្ចព្រមព្រៀងជាមួយទីភ្នាក់ងាIAEA និងសន្ធិសញ្ញាមិនរីកសាយអាវុធ។