អង្គការសហប្រជាជាតិ បាននិយាយកាលពីថ្ងៃចន្ទ (០៣ មីនា) ថា ក្រុមឧទ្ទាម M23 គាំទ្រដោយប្រទេសរ្វ៉ាន់ដា ដែលបើកការវាយលុកនៅភាគខាងកើតកុងហ្គោ បានចាប់ជំរិតបុរសដែលមានជំងឺ និងរងរបួស យ៉ាងហោចណាស់ ១៣០នាក់ ពីមន្ទីរពេទ្យចំនួនពីរកន្លែងក្នុងទីក្រុង Goma កាលពីសប្តាហ៍មុន។

អ្នកនាំពាក្យការិយាល័យសិទ្ធិមនុស្សអង្គការសហប្រជាជាតិ លោកស្រី Ravina Shamdasani បាននិយាយនៅក្នុងសេចក្តីថ្លែងការណ៍មួយថា ក្រុមយុទ្ធជន M23 វាយឆ្មក់ចូលមន្ទីរពេទ្យ CBCA Ndosho នាំយកអ្នកជំងឺ ១១៦នាក់ពីទីនោះ និងមន្ទីរពេទ្យ Heal Africa ដោយចាប់ខ្លួនអ្នកជំងឺ ១៥នាក់ នៅយប់ថ្ងៃទី២៨ ខែកុម្ភៈ ដោយសារសង្ស័យថាពួកគេជាទាហានកុងហ្គោ ឬកងជីវពលគាំទ្ររដ្ឋាភិបាល។

ក្រុមឧទ្ទាម M23 ដឹកនាំដោយជនជាតិទូស៊ី បានសម្រុកចូលក្នុងទីក្រុង Goma នៅចុងខែមករា ហើយចាប់តាំងពីពេលនោះមក បានវាយរុលទៅមុខយ៉ាងលឿនទៅកាន់ភាគខាងកើតកុងហ្គោ ដោយដណ្តើមយកទឹកដី និងទទួលបានតំបន់ធនធានរ៉ែដ៏មានតម្លៃ។ 

យោងតាមរដ្ឋាភិបាលបានឱ្យដឹងថា មនុស្សប្រហែល ៧.០០០នាក់ ត្រូវបានសម្លាប់នៅភាគខាងកើតកុងហ្គោ ចាប់តាំងពីខែមករាមក ហើយមនុស្សជិតកន្លះលាននាក់គ្មានទីជម្រក បន្ទាប់ពីជំរំភៀសខ្លួន ៩០កន្លែង ត្រូវបានបំផ្លាញនៅក្នុងការប្រយុទ្ធគ្នានេះ៕