នគរបាលបាននិយាយថា រថយន្តដឹកទំនិញមួយគ្រឿងដែលកំពុងធ្វើដំណើរលើផ្លូវហាយវេមួយនៅភាគខាងត្បូងប្រទេសបូលីវី បានបុកជាមួយនឹងរថយន្តក្រុងមួយគ្រឿងកាលពីព្រឹកថ្ងៃចន្ទ (០៣ មីនា) ដោយបង្ខំឱ្យរថយន្តក្រុងបើកធ្លាក់ចេញពីផ្លូវ និងបានសម្លាប់មនុស្សយ៉ាងហោចណាស់ ៣១នាក់។

ថ្លែងទៅកាន់អ្នកសារព័ត៌មាន អ្នកនាំពាក្យនគរបាលបានបញ្ជាក់ចំនួនអ្នកស្លាប់នេះ ដោយរួមមានទាំងបុរស និងស្ត្រី ខណៈរថយន្តគិលានសង្គ្រោះ និងរថយន្តសង្គ្រោះបន្ទាន់ បានទៅដល់កន្លែងកើតហេតុ ដោយមនុស្ស ២២នាក់ផ្សេងទៀតរងរបួស។

លោកប្រធានាធិបតី Luis Arce បានសម្តែងការរំលែកទុក្ខចំពោះជនរងគ្រោះនៅលើប្រព័ន្ធផ្សព្វផ្សាយសង្គម។ នគរបាលនិយាយថា រថយន្តក្រុងបានរមៀលធ្លាក់ប្រហែល ៥០០ម៉ែត្រចុះក្នុងជ្រោះមួយ បន្ទាប់ពីការបុកគ្នា ដែលបានកើតឡើងនៅលើផ្លូវហាយវ៉េ Oruro។

នគរបាលបន្ថែមថា អ្នកបើកបររថយន្តដឹកទំនិញត្រូវបានចាប់ខ្លួន ខណៈមូលហេតុនៃឧបទ្ទវហេតុកំពុងស្ថិតក្រោមការស៊ើបអង្កេត។ គ្រោះថ្នាក់ចរាចរណ៍នេះកើតឡើងតែប៉ុន្មានថ្ងៃប៉ុណ្ណោះ បន្ទាប់ពីមនុស្សរាប់សិបនាក់បានស្លាប់នៅក្នុងតំបន់ដូចគ្នានេះ ក្នុងគ្រោះថ្នាក់រថយន្តក្រុងពីរគ្រឿងបុកគ្នា៕