នៅមុនកិច្ចសន្ទនាថ្នាក់ជាតិរបស់សាធារណរដ្ឋអារ៉ាប់ស៊ីរី ដែលធ្វើឡើងនៅទីក្រុងដាម៉ាស នាថ្ងៃទី ២៥ ខែកុម្ភៈ សហភាពអឺរ៉ុប បានធ្វើកាយវិការសំខាន់នៃសុច្ឆន្ទៈ ដោយយល់ព្រមដកផ្នែកមួយនៃទណ្ឌកម្មដែល  បានដាក់លើរបបរបស់លោក បាសា អាល់អាសាដ ( Bashar Assad) ដែលបច្ចុប្បន្នត្រូវបានទម្លាក់តំណែង។

ទោះបីជាយ៉ាងណាក៏ដោយ ការដកទណ្ឌកម្មទាំងស្រុង និងនិរន្តរភាពលើប្រទេសស៊ីរី មិនទាន់ត្រូវបានធានា នៅឡើយទេ ព្រោះថាបច្ចុប្បន្ន ក្រុមមេដឹកនាំលោកខាងលិច មិនទាន់ជឿជាក់ថា រដ្ឋបាលចម្រុះ ដែលមានឆន្ទៈក្នុងការអនុវត្តកំណែទម្រង់ដែលត្រូវការយ៉ាងខ្លាំងនោះ ទំនងជានឹងអាចធ្វើបាន។

សហភាពអឺរ៉ុប បានប្រកាសកាលពីថ្ងៃទី ២៤ ខែកុម្ភៈថា ខ្លួនបានផ្អាកការរឹតបន្តឹងលើវិស័យប្រេង ឧស្ម័ន អគ្គិសនី និងដឹកជញ្ជូនរបស់ប្រទេសស៊ីរី ដោយមានប្រសិទ្ធិភាពភ្លាមៗ ទន្ទឹមនឹងការបន្ធូរបន្ថយការហាមឃាត់របស់ខ្លួនលើទំនាក់ទំនងធនាគារ ដើម្បីអនុញ្ញាតឲ្យមានប្រតិបត្តិការសម្រាប់ជំនួយមនុស្សធម៌ ការកសាងឡើងវិញ ថាមពល និងការដឹកជញ្ជូន។

លើសពីនេះទៀត អង្គភាពហិរញ្ញវត្ថុចំនួន ៥ ដូចជា ធនាគារឧស្សាហកម្ម ធនាគារឥណទានប្រជាប្រិយធនាគារសន្សំ ធនាគារសហករណ៍កសិកម្ម និងក្រុមហ៊ុនអាកាសចរណ៍ស៊ីរីអារ៉ាប់ ត្រូវបានដកចេញពីបញ្ជីបង្កកទ្រព្យសម្បត្តិ ដែលអនុញ្ញាតឲ្យមូលនិធិ ទៅដល់ធនាគារកណ្តាលរបស់ប្រទេសស៊ីរី។