មានរយៈពេលប្រហែលប្រាំឆ្នាំ បន្ទាប់ពីករណីដំបូងត្រូវបានបញ្ជាក់អំពីជំងឺ COVID-19 នៅសហរដ្ឋអាមេរិក ជាប្រទេសដែលនៅតែបន្តប្រឈមទៅនឹងផលប៉ះពាល់ដ៏យូរអង្វែងនៃជំងឺរាតត្បាតលើសុខភាពសាធារណៈ សេដ្ឋកិច្ច និងសង្គម។

យោងតាមមជ្ឈមណ្ឌលគ្រប់គ្រង និងបង្ការជំងឺ(CDC) បានឱ្យដឹងថា ជំងឺកូវីដ-១៩ បានឆក់យកជីវិតជនជាតិអាមេរិកជាង ១,២ លាននាក់។ វ៉ាក់សាំងនិងការព្យាបាល បានកាត់បន្ថយជំងឺធ្ងន់ធ្ងរយ៉ាងខ្លាំង ប៉ុន្តែវីរុសនៅតែជាបញ្ហាប្រឈមផ្នែកសុខភាពសាធារណៈដែលនៅតែមាន ប៉ុន្តែវាក៏បានបង្ហាញពីការខ្វែងគំនិតគ្នានៅក្នុងសហរដ្ឋអាមេរិក ផងដែរ។ ជំងឺរាតត្បាត បានធ្វើឱ្យមានការបែងចែកផ្នែកនយោបាយយ៉ាងជ្រៅលើវិធានការសុខភាពសាធារណៈ វ៉ាក់សាំង និងអន្តរាគមន៍របស់រដ្ឋាភិបាល។ ការពាក់ម៉ាស់ជាកាតព្វកិច្ច ការបិទខ្ទប់ និងតម្រូវការវ៉ាក់សាំង បានបង្កឱ្យមានការតវ៉ា និងការតស៊ូមតិតាមផ្លូវច្បាប់។

នៅពេលដែលអង្គការសុខភាពពិភពលោក (WHO) បានប្រកាសថា ជំងឺCOVID-19 ជាជំងឺរាតត្បាតសកលនៅថ្ងៃទី ១១ ខែមីនា ឆ្នាំ ២០២០ វីរុសនេះបានឆក់យកជីវិតមនុស្ស ៣៦ នាក់នៅសហរដ្ឋអាមេរិក។ ប៉ុន្មានខែក្រោយមក វីរុសដ៏កាចសាហាវនេះ បានរាលដាលយ៉ាងឆាប់រហ័ស នៅក្នុងតំបន់ទីក្រុងនានាដែលមានប្រជាជនរស់នៅច្រើន ព្រមទាំងទីក្រុងញូវយ៉ក ហើយបន្ទាប់មកបានរាលដាលទៅដល់គ្រប់តំបន់របស់ប្រទេស។

ពលរដ្ឋអាមេរិករាប់លាននាក់បានមូរដៃអាវរបស់ពួកគេយ៉ាងអន្ទះសារដើម្បីទទួលយកវ៉ាក់សាំងបង្ការជំងឺ COVID-១៩ បន្ទាប់ពីការចែកចាយចាប់ផ្តើមនៅចុងឆ្នាំ២០២០។ នៅដើមឆ្នាំ២០២១ វីរុសនេះបានឆក់យកជីវិតមនុស្ស៥០០.០០០ រួចទៅហើយ។