បណ្ដាមេដឹកនាំអារ៉ាប់ នៅថ្ងៃអង្គារ (ទី៤ ខែមីនា) នេះ កំពុងជួបជុំគ្នា នៅទីក្រុងគែរ ប្រទេសអេហ្ស៊ីប ដើម្បីបើកកិច្ចពិភាក្សា អំពីការបង្កើតជម្រើសផ្សេងទៀតជំនួសឲ្យផែនការដែលត្រូវបានថ្កោលទោសយ៉ាងទូលំទូលាយរបស់លោក Donald Trump ដោយលោកប្រធានាធិបតីអាមេរិករូបនេះចង់កាន់កាប់តំបន់ហ្កាហ្សាដែលរងវិនាសកម្មដោយសង្រ្គាម និងចង់ផ្លាស់ទីលំនៅប្រជាជនប៉ាឡេស្ទីនទៅកន្លែងផ្សេង។

កិច្ចប្រជុំកំពូលរបស់សម្ព័ន្ធអារ៉ាប់ ស្តីពីការកសាងឡើងវិញ ចំពោះទឹកដីនេះ កើតមានឡើងមួយថ្ងៃបន្ទាប់ពីនាយករដ្ឋមន្រ្តីអ៊ីស្រាអែល លោក Benjamin Netanyahu ជាថ្មីម្ដងទៀត បានផ្តល់ការគាំទ្រ ចំពោះផែនការរបស់លោក Trump ដោយហៅគម្រោងនេះថា «ប្រកបដោយចក្ខុវិស័យ និងភាពប្លែកថ្មី»។

ប្រជាជនប៉ាឡេស្ទីន រួមជាមួយនឹងពិភពអារ៉ាប់ និងដៃគូជាច្រើនរបស់អ៊ីស្រាអែល និងសហរដ្ឋអាមេរិក បានថ្កោលទោស ចំពោះសំណើរបស់លោក Trump ដោយបដិសេធមិនទទួលយករាល់កិច្ចប្រឹងប្រែង ដើម្បីយកអ្នកស្រុកចេញពីតំបន់ហ្កាហ្សា។

បើយោងតាមការប៉ាន់ប្រមាណរបស់អង្គការសហប្រជាជាតិ បានបង្ហាញថា ការចំណាយលើការកសាងឡើងវិញ ចំពោះតំបន់ហ្កាហ្សា គឺជាង ៥៣ពាន់លានដុល្លារអាមេរិក បន្ទាប់ពីមានភ្លើងសង្គ្រាមដែលឆាបឆេះឡើងដោយការវាយប្រហាររបស់ក្រុមហាម៉ាស កាលពីថ្ងៃទី៧ ខែតុលា ឆ្នាំ២០២៣ លើអ៊ីស្រាអែល។

ដោយនិយាយក្នុងលក្ខខណ្ឌមិនបញ្ចេញឈ្មោះ ប្រភពមួយពីសម្ព័ន្ធអារ៉ាប់ បានប្រាប់ទីភ្នាក់ងារសារព័ត៌មានបារាំង AFP ថា រដ្ឋមន្ត្រីការបរទេសអារ៉ាប់ បានជួបប្រជុំគ្នា នៅរដ្ឋធានីអេហ្ស៊ីប កាលពីថ្ងៃទី៣ ខែមីនា សម្រាប់សម័យប្រជុំត្រៀមដោយបិទទ្វារដែលផ្តោតលើផែនការកសាងដែនដីនេះឡើងវិញ ដោយមិនមានការផ្លាស់ទីលំនៅរបស់អ្នកស្រុក។

ប្រភពនោះបានបន្ថែមថា ផែនការនេះនឹងត្រូវបង្ហាញដល់មេដឹកនាំអារ៉ាប់ ក្នុងកិច្ចប្រជុំកំពូលនៅថ្ងៃអង្គារនេះ ដើម្បីអនុម័ត។ ប្រមុខរដ្ឋនៃប្រទេសអារ៉ាប់ជាច្រើន ត្រូវបានគេរំពឹងថា នឹងចូលរួមកិច្ចប្រជុំនេះ ខណៈដែលប្រទេសមួយចំនួនបានបញ្ជូនរដ្ឋមន្ត្រីការបរទេស ឬតំណាងជាន់ខ្ពស់ផ្សេងទៀត៕