មេដឹកនាំ និងជាប្រមុខយោធារបស់សហភាពមីយ៉ាន់ម៉ា គឺលោកឧត្តមសេនីយ៍ Min Aung Hlaing នៅថ្ងៃអង្គារ (ទី៤ ខែមីនា) នេះ ត្រូវបានទទួលស្វាគមន៍ដោយមន្ត្រីសន្តិសុខជាន់ខ្ពស់របស់ប្រធានាធិបតីរុស្ស៊ី លោក Vladimir Putin នៅទីក្រុងមូស្គូ។

សារព័ត៌មាន Izvestia បានរាយការណ៍ថា លោក Sergei Shoigu រដ្ឋមន្ត្រីទទួលបន្ទុកក្រុមប្រឹក្សាសន្តិសុខរុស្ស៊ី ត្រូវបានឃើញឱបលោកឧត្តមសេនីយ៍ Min Aung Hlaing មុនមានកិច្ចប្រជុំដែលត្រូវបានគ្រោងទុកជាមួយលោក Putin និងក្រសួងការពារជាតិ។

គួរដឹងថា លោកឧត្តមសេនីយ៍ Min Aung Hlaing វ័យ ៦៨ឆ្នាំ កម្រធ្វើដំណើរទៅក្រៅប្រទេសណាស់។ សហភាពមីយ៉ាន់ម៉ា ដែលជាប្រទេសមានប្រជាជនចំនួន ៥៥លាននាក់ បានជួបប្រទះភាពចលាចល ចាប់តាំងពីខែកុម្ភៈ ឆ្នាំ២០២១ មក នៅពេលដែលពួកយោធាបានទម្លាក់ការកាន់អំណាចរបស់ម្ចាស់ជ័យលាភីណូបែល និងជាមេដឹកនាំរបស់គណបក្ស NLD គឺលោកស្រី Aung San Suu Kyi។

របបយោធាគ្រោងនឹងរៀបចំការបោះឆ្នោត នៅឆ្នាំ២០២៥ ដែលអ្នករិះគន់បានចំអកថា ជាការរៀបចំបោកប្រាស់ ដើម្បីធ្វើឲ្យឧត្តមសេនីយបន្តកាន់អំណាចតាមរយៈអ្នកតំណាង។

រួមជាមួយប្រទេសចិន រុស្ស៊ីគឺជាអ្នកគាំទ្រយោធារបស់មីយ៉ាន់ម៉ា ហើយមហាអំណាចទាំង២ បានវេតូសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលថ្កោលទោសការរំលោភសិទ្ធិមនុស្សនៅក្នុងប្រទេសនេះ។ សហភាពសូវៀតបានបង្កើតទំនាក់ទំនងជាមួយមីយ៉ាន់ម៉ា នៅពេលដែលប្រទេសនេះទទួលបានឯករាជ្យពីចក្រភពអង់គ្លេស ក្នុងឆ្នាំ១៩៤៨៕