ក្រសួងការពារជាតិបែលហ្ស៊ិក នៅថ្ងៃអង្គារ (ទី៤ ខែមីនា) នេះ បានប្រាប់ឲ្យដឹងថា រដ្ឋាភិបាលបែលហ្ស៊ិកមានគោលបំណងពន្លឿនការចំណាយលើវិស័យការពារជាតិចំនួន ៤ពាន់លានអឺរ៉ូ (៤,២ពាន់លានដុល្លារ) ក្នុងរយៈពេលប៉ុន្មានខែខាងមុខនេះ ដោយបញ្ជាក់ពីសេចក្ដីរាយការណ៍របស់សារព័ត៌មានបែលហ្ស៊ិក De Tijd ដែលដកស្រង់សម្តីរបស់នាយករដ្ឋមន្ត្រីលោក Bart De Wever។

ការបង្កើនឡើងនេះគួរតែនាំឲ្យការចំណាយលើវិស័យការពារជាតិសរុបរបស់ប្រទេសបែលហ្ស៊ិកកើនដល់ ២ភាគរយនៃផលិតផលក្នុងស្រុកសរុប (GDP) នៅឆ្នាំនេះ ជាកម្រិតអប្បបរមាដែលបានព្រមព្រៀងគ្នា ក្នុងចំណោមសមាជិកសម្ព័ន្ធមិត្តណាតូ។

អ្នកនាំពាក្យក្រសួង បាននិយាយថា រដ្ឋមន្ត្រីការពារជាតិបែលហ្ស៊ិក លោក Theo Francken នឹងស្នើការដំឡើងនេះ នៅក្នុងកិច្ចប្រជុំគណៈរដ្ឋមន្ត្រីបន្ទាប់ នាថ្ងៃសុក្រចុងសប្ដាហ៍នេះ។

រដ្ឋាភិបាលបែលហ្ស៊ិកថ្មី បានលើកឡើងកាលពីខែមុនថា វានឹងឈានដល់កម្រិតនេះត្រឹមឆ្នាំ២០២៩។ ការចំណាយលើវិស័យការពារជាតិបច្ចុប្បន្ន មានកម្រិតប្រហែល ១,៣ភាគរយនៃផលិតផលក្នុងស្រុកសរុបរបស់បែលហ្ស៊ិក ហើយមិនធ្លាប់បានឈានដល់កម្រិត ២ភាគរយ ពីមុនមកទេ។

សារព័ត៌មាន De Tijd បានរាយការណ៍ថា លោក De Wever មានបំណងចង់ឲ្យចំណាយខ្ពស់ជាងនេះទៀត នៅមុនកិច្ចប្រជុំកំពូលរបស់អង្គការណាតូ នាថ្ងៃទី២៤ ខែមិថុនា៕