ឧបនាយករដ្ឋមន្ត្រីអង់គ្លេស បាននិយាយនៅថ្ងៃអង្គារនេះថា លោកនាយករដ្ឋមន្ត្រី លោក Keir Starmer ផ្តោតកាន់តែខ្លាំងទៅលើការធានាសន្តិភាព ក្នុងប្រទេសអ៊ុយក្រែន បន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានផ្អាកជំនួយយោធា ដល់ទីក្រុងគីវ។  

លោកស្រី Angela Rayner បាននិយាយថា ការផ្អាកជំនួយនេះ គឺជា «បញ្ហា» សម្រាប់សហរដ្ឋអាមេរិក ហើយវាមិនបានផ្លាស់ប្តូរវិធីសាស្រ្តរបស់លោក Starmer ក្នុងការព្យាយាមស្វែងរកបទឈប់បាញ់ដ៏សមរម្យមួយសម្រាប់ជម្លោះរុស្ស៊ី-អ៊ុយក្រែននោះទេ។

លោកស្រី Rayner បានប្រាប់សារព័ត៌មាន BBC បន្ទាប់ពីត្រូវបានស្នើសុំឲ្យមានប្រតិកម្មរបស់លោកស្រី ចំពោះការប្រកាសរបស់លោក ត្រាំ ថា៖«លោកនាយករដ្ឋ បានបង្កើនការផ្តោតទៅលើការទទួលបានសន្តិភាព។ លោក នឹងមិនមានឧបសគ្គ ដោយសារការប្រកាសផ្អាកជំនួយដោយលោក ត្រាំនោះទេ»។ 

លោកស្រីបានបន្ថែមថា រដ្ឋាភិបាលការងាររបស់ចក្រភពអង់គ្លេស បាន«ផ្តោតលើការគាំទ្រដល់អ៊ុយក្រែន» និង «នាំសហរដ្ឋអាមេរិក រួមជាមួយដៃគូអឺរ៉ុបរបស់យើង និងអ៊ុយក្រែន ចូលរួមតុចរចា»។