ក្រុមមន្រ្តីក្នុងស្រុក និយាយថា ការវាយប្រហារដោយយានដ្រូនរុស្ស៊ីកាលពីថ្ងៃចន្ទម្សិល បណ្តាលឲ្យខូចខាតហេដ្ឋារចនាសម្ព័ន្ធថាមពលនៅទីក្រុងកំពង់ផែ Odesa ស្ថិតក្នុងសមុទ្រខ្មៅរបស់អ៊ុយក្រែន បង្កឲ្យដាច់ចរន្តអគ្គិសនីនៅក្នុងទីក្រុងមួយនេះ និងធ្វើឲ្យប៉ះពាល់យ៉ាងខ្លាំងដល់ប្រព័ន្ធផ្តល់កម្តៅ ។

រូបភាពវីដេអូឃ្លីបពីសេវាកម្មសង្រ្គោះបន្ទាន់អ៊ុយក្រែន ឃើញអគ្គិភ័យរងការឆាបឆេះ រថយន្តរងការខូចខាត និងកម្ទេចកម្ទីរាយប៉ាយពាសពេញដី ។

លោក Oleh Kiper គឺជាអភិបាលតំបន់ Odesa និយាយនៅលើបណ្តាញព័ត៌មានសង្គម Telegramថា ការវាយប្រហារនេះ ធ្វើឲ្យខូចខាតហេដ្ឋារចនាសម្ព័ន្ធថាមពល ហើយបច្ចុប្បន្នមាននូវការដាច់ចរន្តអគ្គិសនីនៅតាមតំបន់ជាច្រើនរបស់ទីក្រុង ។

ដោយឡែក អភិបាលក្រុង Odesa លោក Hennady Trukhanov និយាយថា ការវាយប្រហារខាងលើ បានបំផ្លាញរោងចក្រផ្តល់កម្តៅ ៣កន្លែង បង្ខំឲ្យក្រុមមន្រ្តីប្រញាប់ប្រញល់ស្វែងរកប្រភពថាមពលជំនួស ដើម្បីស្តាឡើងប្រព័ន្ធកម្តៅផ្តល់ជូនដល់ប្រជាពលរដ្ឋរស់នៅក្នុងទីក្រុង ៕