សាស្រ្តាចារ្យជាន់ខ្ពស់មួយរូបនិយាយនៅថ្ងៃអង្គារនេះថា ការបញ្ឈប់ជំនួយយោធាសហរដ្ឋអាមេរិកដល់អ៊ុយក្រែន នឹងមានផលប៉ះពាល់មិនធម្មតាដល់ទីក្រុងគីវ ហើយនិងបង្ខំឲ្យប្រធានាធិបតីអ៊ុយក្រែនលោក Volodymyr Zelenskiy សុខចិត្តយល់ព្រមផ្តល់សម្បទាន ។

មន្រ្តីសេតវិមានមួយរូបដែលសុំមិនបញ្ចេញឈ្មោះ និយាយកាលពីយប់ថ្ងៃចន្ទថា សហរដ្ឋអាមេរិកបានផ្អាក និងពិនិត្យមើលឡើងវិញជំនួយរបស់ពួកគេ ដើម្បីធានាថា វារួមចំណែកដល់ដំណោះស្រាយសន្តិភាព ។

ការសម្រេចចិត្តបែបនេះ បានកើតមានឡើងរយៈពេលប៉ុន្មានថ្ងៃប៉ុណ្ណោះ ក្រោយការប៉ះទង្គិចគ្នាដោយពាក្យសម្តីរវាងប្រធានាធិបតីសហរដ្ឋអាមេរិកលោក Donald Trump និងលោក Zelenskiy នៅការិយាល័យ Oval របស់សេតវិមានកាលពីសប្តាហ៍មុន ។

យោងតាមសេចក្តីរាយការណ៍ពីកាសែត Bloomberg និង Fox News បានឲ្យដឹងថា ការផ្អាកជំនួយយោធានេះ នឹងមានរយៈពេលរហូតដល់លោក Trumpកំណត់ថា ក្រុមមេដឹកនាំអ៊ុយក្រែន បង្ហាញការប្តេជ្ញាចិត្តល្អលើសន្តិភាព ។

លោក Marco Duranti គឺជាប្រវត្តិវិទូ និងជាសាស្រ្តាចារ្យជាន់ខ្ពស់មួយរូបនៅសាកលវិទ្យាល័យ Sydney បាននិយាយថា សហរដ្ឋអាមេរិកបានផ្តល់បរិមាណទ្វេដងដែលអឺរ៉ុបមាន បន្ថែមពីលើជំនួយចារកម្មសំខាន់ៗផងដែរ ។ ដូច្នេះហើយផលប៉ះពាល់នឹងធំធេងសម្រាប់អ៊ុយក្រែន ។ លោកបន្តថា នេះគឺជាអ្វីមួយដែលលោក Putin ចង់មានក្តីស្រមៃតែមួយគត់ ៕