ការផ្សាយផ្ទាល់មួយ បានបង្ហាញឲ្យឃើញថា តំណាងរាស្ត្ររបស់ក្រុមប្រឆាំង នៅប្រទេសស៊ែប៊ី បានគប់គ្រាប់បែកផ្សែង និងឧស្ម័នបង្ហូរទឹកភ្នែក នៅខាងក្នុងរដ្ឋសភា នាថ្ងៃអង្គារ (ទី៤ ខែមីនា) នេះ ដែលជាការបង្ហាញការប្រឆាំង ចំពោះគោលនយោបាយរបស់រដ្ឋាភិបាល និងការគាំទ្រដល់និស្សិតដែលកំពុងតវ៉ា។

បាតុកម្មបង្កឡើងដោយការបាក់ដំបូលស្ថានីយ៍រថភ្លើងដែលបានសម្លាប់មនុស្ស ១៥នាក់ កាលពី ៤ខែមុខ បានក្លាយទៅជាការគំរាមកំហែងដ៏ធំបំផុត ចំពោះរដ្ឋាភិបាលស៊ែប៊ី។

អំឡុងសម័យប្រជុំសភា បន្ទាប់ពីក្រុមចម្រុះដែលកំពុងកាន់អំណាចដឹកនាំដោយគណបក្សស៊ែប៊ីជឿនលឿន (SNS) បានអនុម័តរបៀបវារៈ អ្នកនយោបាយប្រឆាំងមួយចំនួន បានរត់ចេញពីកៅអីរបស់ពួកគេឆ្ពោះទៅកាន់ប្រធានសភា ហើយបានប៉ះទង្គិចជាមួយសន្តិសុខ។

អ្នកផ្សេងទៀតបានគប់គ្រាប់បែកផ្សែង និងឧស្ម័នបង្ហូរទឹកភ្នែក ដោយការផ្សាយផ្ទាល់របស់ទូរទស្សន៍ បានបង្ហាញឲ្យឃើញពីផ្សែងពណ៌ខ្មៅ និងផ្កាឈូក ហុយទ្រលោមនៅខាងក្នុងអគាររដ្ឋសភា។

ប្រធានសភា លោកស្រី Ana Brnabic បាននិយាយថា សមាជិកសភា ២នាក់ បានរងរបួស ដោយម្នាក់ឈ្មោះ Jasmina Obradovic មកពីគណបក្ស SNS បានសន្លប់ដោយសាររងរបួសក្បាល ហើយកំពុងស្ថិតក្នុងស្ថានភាពធ្ងន់ធ្ងរ។ ហើយលោកស្រីបានប្រាប់អង្គប្រជុំថា៖ «សភានឹងបន្តធ្វើការ និងការពារប្រទេសស៊ែប៊ី»។

នៅថ្ងៃអង្គារនេះ សភាគ្រោងអនុម័តច្បាប់បង្កើនមូលនិធិ សម្រាប់សាកលវិទ្យាល័យ ជាការទាមទារដ៏ធំមួយរបស់និស្សិតដែលរារាំងមិនឲ្យចូលមហាវិទ្យាល័យ ចាប់តាំងពីខែធ្នូឆ្នាំមុន។ សភាក៏ត្រូវទទួលដឹងផងដែរនូវការលាលែងពីតំណែងរបស់នាយករដ្ឋមន្ត្រី លោក Milos Vucevic។ ប៉ុន្តែបញ្ហាផ្សេងទៀតដែលដាក់ក្នុងរបៀបវារៈដោយរដ្ឋាភិបាលចម្រុះ បានធ្វើឲ្យគណបក្សប្រឆាំងខឹងសម្បា៕