ក្នុងពេលដែលសម្តេច ប៉ាប ហ្វ្រង់ស៊ីស បាន និងកំពុងតស៊ូជាមួយជំងឺរលាកសួតទាំង២ នៅក្នុងមន្ទីរពេទ្យអស់រយៈពេលជិត ៣សប្តាហ៍មកហើយនោះ ការនិយាយ អំពីការសោយទិវង្គតរបស់សម្តេចសង្ឃព្រះជន្ម ៨៨វស្សា ឬការលាលែងពីតំណែងរបស់ព្រះអង្គ បានក្លាយជារឿងដែលស្ទើរតែមានភាពធម្មតាទៅហើយ។

សារព័ត៌មានមួយចំនួន បានចុះផ្សាយអត្ថបទជូនដំណឹងដល់អ្នកអានរបស់ពួកគេ អំពីអ្វីដែលត្រូវបានរំពឹងទុកនៅក្នុងពិធីបុណ្យព្រះសពរបស់សម្តេច ប៉ាប ហ្វ្រង់ស៊ីស។ មន្ត្រីកាតូលិកជាន់ខ្ពស់មួយចំនួន កំពុងនិយាយដោយបើកចំហ អំពីលទ្ធភាពដែលថា សម្ដេច ប៉ាប ហ្វ្រង់ស៊ីស អាចធ្វើតាមអ្នកកាន់តំណែងមុនរបស់ព្រះអង្គ គឺសម្ដេច Benedict XVI ដែលលាលែងពីតំណែងមុនសោយទិវង្គត។

ប៉ុន្តែសម្ដេច ប៉ាប ហ្វ្រង់ស៊ីស មានព្រះជន្មនៅឡើយ ដោយការធ្វើបច្ចុប្បន្នភាពថ្មីៗបំផុតរបស់បុរីវ៉ាទីកង់ បង្ហាញថា ស្ថានភាពរបស់ព្រះអង្គ អាចនឹងមានភាពប្រសើរឡើង ទោះបីជាមានបញ្ហាកាលពីថ្ងៃចន្ទក៏ដោយ។

ហើយផ្នែកលើការផ្ដល់ព័ត៌មានពីមន្ទីរពេទ្យ Gemelli នៅទីក្រុងរ៉ូម ប្រទេសអ៊ីតាលី ជាកន្លែងដែលព្រះអង្គបានទទួលការព្យាបាលតាំងពីថ្ងៃទី១៤ ខែកុម្ភៈមកនោះ សម្តេច ប៉ាប ហ្វ្រង់ស៊ីស ហាក់ដូចជាមិនមានគម្រោងលាលែងពីតំណែងណាមួយ ក្នុងពេលឆាប់ៗនេះទេ។

ពាក្យចចាមអារ៉ាម អំពីការលាលែងពីតំណែងរបស់សម្តេច ប៉ាប ហ្វ្រង់ស៊ីស បានចាប់ផ្តើមមាន ២-៣ថ្ងៃបន្ទាប់ពីព្រះអង្គយាងចូលសម្រាកព្យាបាលក្នុងមន្ទីរពេទ្យ៕