យោងតាមក្រុមពាណិជ្ជករ និងអ្នកវិភាគបានឱ្យដឹងថា តម្លៃប្រេងសាំងលក់រាយរបស់សហរដ្ឋអាមេរិក នឹងកើនឡើងខ្ពស់ខ្លាំងក្នុងប៉ុន្មានសប្តាហ៍ខាងមុខនេះ ដោយសារតែការដំឡើងពន្ធថ្មីដែលបានបង្កជាសង្រ្គាមពាណិជ្ជកម្មដោយរដ្ឋបាលលោកប្រធានាធិបតី Donald Trump រួមចំណែកបង្កើនតម្លៃនៃការនាំចូលថាមពល។

ចក្ខុវិស័យនេះគូសបញ្ជាក់ពីផលវិបាកដែលមិននឹកស្មានដល់នៃគោលនយោបាយពាណិជ្ជកម្មគាំពារនិយមរបស់លោក Trump ដែលមានបំណងជំរុញសេដ្ឋកិច្ចអាមេរិក ប៉ុន្តែអាចនាំឱ្យមានការចំណាយកាន់តែធំជាងមុនសម្រាប់អ្នកប្រើប្រាស់។

ពន្ធ ២៥% លើការនាំចូលទាំងអស់ពីម៉ិកស៊ិក ពន្ធ ១០% លើថាមពលកាណាដា និងពន្ធទ្វេដងលើទំនិញចិនដល់ ២០% បានចូលជាធរមានកាលពីថ្ងៃអង្គារ ០៤ មីនា ខណៈរដ្ឋបាលលោក Trump ក៏បានដាក់ពន្ធ ២៥% លើការនាំចូលផ្សេងទៀតទាំងអស់របស់កាណាដាផងដែរ។

នោះបានបង្កឱ្យមានកំណើនតម្លៃប្រេងសាំងលក់ដុំរួចទៅហើយនៅភាគឦសានសហរដ្ឋអាមេរិក ដែលជាតំបន់ដែលពឹងផ្អែកខ្លាំងលើការនាំចេញប្រេងសាំង ឥន្ធនៈកម្ដៅ និងម៉ាស៊ូតរបស់កាណាដា នេះបើយោងតាមស្ថាប័នចែកចាយប្រេងឥន្ធនៈ TACenergy។ អ្នកជំនាញផ្នែកប្រេងលក់រាយព្រមានថា កំណើនតម្លៃនោះនឹងចាប់ផ្តើមតម្រង់ទៅកាន់ប្រេងសាំងរបស់តំបន់ New England របស់អាមេរិក ក្នុងពេលឆាប់ៗនេះ ហើយអាចបន្ថែមពី ២០ ទៅ ៤០សេនក្នុងមួយហ្គាឡុង៕