សន្និសីទស្តីពីសន្ធិសញ្ញារបស់អង្គការសហប្រជាជាតិដែលហាមឃាត់អាវុធនុយក្លេអ៊ែរ កំពុងប្រព្រឹត្តទៅដោយគ្មានសមាជិកសម្ព័ន្ធយោធាណាតូចូលរួមជាអ្នកសង្កេតការណ៍ឡើយ។ កិច្ចប្រជុំលើកទីបី នៃរដ្ឋភាគី សន្ធិសញ្ញាស្តីពីការហាមឃាត់អាវុធនុយក្លេអ៊ែរ បានបើកនៅទីស្នាក់ការអង្គការសហប្រជាជាតិ នៅទីក្រុងញូវយ៉ក។ សន្និសីទនេះ កំណត់ពេលធ្វើរយៈពេលប្រាំថ្ងៃ។

ប្រទេសអាល់បានី ដែលជាសមាជិករបស់អង្គការ NATO ត្រូវបានគេមើលឃើញថា បានអង្គុយនៅអាសនៈរបស់អ្នកសង្កេតការណ៍នៅថ្ងៃដំបូង ប៉ុន្តែឈ្មោះរបស់ប្រទេសនេះត្រូវបានដកចេញ មុនពេលសន្និសីទបន្តនៅថ្ងៃទីពីរ។

សមាជិកអង្គការណាតូ មាន អាល្លឺម៉ង់ បែលហ្ស៊ិក និងន័រវេស ដែលបានចូលរួមកិច្ចប្រជុំពីរលើកកាលពីពេលមុននៃសន្និសីទ ក្នុងនាមជាអ្នកសង្កេតការណ៍ មិនបានចូលរួមនៅក្នុងកិច្ចប្រជុំលើកនេះទេ។

អ្នកតំណាងក្រុមស៊ីវិលន័រវេស ដែលឃ្លាំមើលកិច្ចប្រឹងប្រែងរំសាយអាវុធ បាននិយាយថា លោកស្រីសោកស្ដាយចំពោះអវត្តមានរបស់សមាជិកអង្គការNATO។ លោកស្រី និយាយថា ការមិនចូលរួមក្នុងវេទិកាសំខាន់មួយអំពីអាវុធនុយក្លេអ៊ែរ ពុំមែនស្ថិតក្នុងប្រយោជន៍ផ្ទាល់ខ្លួនឬពលរដ្ឋរបស់ពួកគេទេ។ ប្រទេសអូស្ត្រាលី ដែលជាប្រទេសស្ថិតក្រោមឆ័ត្រនុយក្លេអ៊ែររបស់សហរដ្ឋអាមេរិក កំពុងចូលរួមជាអ្នកសង្កេតការណ៍។