នាយករដ្ឋមន្ត្រីអ៊ុយក្រែន លោក Denys Shmyhal បានសង្កត់ធ្ងន់ថា ជំនួយយោធាមកពីសហរដ្ឋអាមេរិក គឺចាំបាច់ ហើយរាល់កិច្ចខិតខំប្រឹងប្រែងដើម្បីបន្តកិច្ចសហប្រតិបត្តិការ នឹងត្រូវធ្វើឡើង។

លោក Shmyhal បាននិយាយទៅកាន់អ្នកសារព័ត៌មានក្នុងទីក្រុង Kyiv កាលពីថ្ងៃអង្គារ បន្ទាប់ពីបទបញ្ជារបស់ប្រធានាធិបតីអាមេរិក លោក Donald Trump ក្នុងការបញ្ឈប់ជំនួយយោធាអាមេរិកបណ្តោះអាសន្នសម្រាប់ប្រទេសអ៊ុយក្រែន។

លោកនាយករដ្ឋមន្ត្រី បាននិយាយថា ប្រព័ន្ធការពារដែនអាកាស ប៉ាទ្រីយ៉ូត(Patriot) ដែលត្រូវបានផ្តល់ឲ្យដោយសហរដ្ឋអាមេរិក គឺជាអាវុធតែមួយប្រភេទគត់ដែលមានសមត្ថភាពបាញ់ទម្លាក់មីស៊ីលបាលីស្ទីករបស់រុស្ស៊ី រហូតមកដល់ពេលនេះ។ លោកបាននិយាយដដែលៗអំពីសារៈសំខាន់ និងភាពចាំបាច់នៃជំនួយយោធារបស់សហរដ្ឋអាមេរិក។

លោក Shmyhal អះអាងថា សហរដ្ឋអាមេរិក ដែលត្រូវបានចាត់ទុកយ៉ាងទូលំទូលាយថាជាមេដឹកនាំពិភពលោក គឺជាដៃគូធំបំផុតមួយរបស់អ៊ុយក្រែន ហើយបានផ្តល់ការគាំទ្ររយៈពេលបីឆ្នាំមកហើយ ហើយនឹងនៅបន្តការគាំទ្រនេះ។

លោក Shmyhal ក៏បាននិយាយសំដៅទៅលើឧស្សាហកម្មការពារជាតិរបស់អ៊ុយក្រែនផងដែរ។ លោក និយាយថា ប្រទេសរបស់លោកកំពុងផលិតសព្វាវុធ បរិក្ខារ និងគ្រាប់រំសេវចាំបាច់បានជាង៣០ភាគរយរួចហើយ ហើយកំពុងផលិតយ៉ាងសកម្ម ហើយគោលដៅ៥០ភាគរយទៀត នឹងត្រូវសម្រេចបាននៅឆ្នាំនេះ។