​បាល់ទាត់៖ សហព័ន្ធ​កីឡាបាល់ទាត់​កម្ពុជា ​(FFC) បានប្រកាស​ជា​ផ្លូវការថា កម្ពុជា​បានទទួល​សិទ្ធ​ធ្វើ​ម្ចាស់ផ្ទះ​រៀបចំ​ការប្រកួត​បាល់ទាត់​ជើងឯក​អាស៊ីអាគ្នេយ៍​យុវជន​អាយុ​ក្រោម ២៣​ឆ្នាំ ឆ្នាំ​២០២២ (AFF U23 Championship 2022) ចាប់ពី​ថ្ងៃទី​១៤ ដល់​ថ្ងៃទី​២៦ ខែកុម្ភៈ ឆ្នាំ​២០២២ ខាងមុខនៅ​ពហុ​កីឡដ្ឋាន​ជាតិ​មរតក​តេ​ជោ និង​កីឡដ្ឋាន​ព្រី​នស៍។​

​ការប្រកាស​នេះបន្ទាប់ពី​សហព័ន្ធ​កីឡាបាល់ទាត់​អាស៊ីអាគ្នេយ៍​ (AFF) បានប្រកាស​តែងតាំង​ក្រុមហ៊ុន SPORTFIVE ជា​ដៃគូ​ពាណិជ្ជកម្ម​ផ្ដាច់មុខ​រយៈពេល​វែង​រប​ស់​ខ្លួនកាលពី​ថ្មីៗ ដើម្បី​ជំរុញ​ឲ្យ​រាល់​ព្រឹត្តិការណ៍​របស់ AFF ទទួលបាន​ជោគជ័យ ពិសេស​ការប្រកួត AFF Suzuki Cup ក៏ដូចជា​ការប្រកួត​ជើងឯក​យុវជន AFF U23 Championship ផងដែរ។​ ​ឯកឧត្តម ខៀវ សា​ម៉េ​ត ប្រធាន​សហព័ន្ធ​កីឡាបាល់ទាត់​អាស៊ីអាគ្នេយ៍បានបង្ហាញ​នូវ​សុទិដ្ឋិនិយម ក៏ដូចជា​ថ្លែងអំណរគុណចំពោះ​រាជរដ្ឋាភិបាល​កម្ពុជា រួមទាំង​សហព័ន្ធ​កីឡាបាល់ទាត់​កម្ពុជាបាន​ខិតខំ​ប្រឹងប្រែង និង​បានទទួល​សិទ្ធ​ធ្វើ​ម្ចាស់ផ្ទះ​ព្រឹត្តិការណ៍​ប្រចាំ​តំបន់​មួយ​នេះ។​ ​ចំណែក​ឯកឧត្តម​នាយ​ឧ​ត្ត​ម​សេនីយ៍ សៅ សុខា ប្រធាន​សហព័ន្ធ​កីឡាបាល់ទាត់​កម្ពុជា ក៏បាន​បង្ហាញ​សេចក្តីសោមនស្ស​រីករាយ​ក្នុង​ការធ្វើជា​ម្ចាស់ផ្ទះ​ព្រឹត្តិការណ៍ AFF U23 Championship នា​ឆ្នាំ​២០២២ ផងដែរ។

ឯកឧត្តម​បាន​អរគុណ AFF សម្រាប់​ការជឿទុកចិត្ត​មកលើ​កម្ពុជាដើម្បី​រៀបចំ​ព្រឹត្តិការណ៍​នេះ ខណៈ​ឯកឧត្តម​បាន​ប្ដេជ្ញា​នឹង​ប្រឹងប្រែង​ឱ្យ​អស់ពី​សមត្ថភាព ដើម្បី​ធានាថា​ការប្រកួត​ប្រព្រឹត្ត​ទៅដោយ​សុវត្ថិភាព សម្រាប់​អ្នកពាក់ព័ន្ធ​ទាំងអស់ ហើយ​ទន្ទឹងរង់ចាំ​ការធ្វើជា​ម្ចាស់ផ្ទះ​ការប្រកួត​បាល់ទាត់​យុវជន​ល្អ​បំផុត​នៅ​អាស៊ាននា​ឆ្នាំក្រោយ។​ ​គួរ​ដឹងថា ពានរង្វាន់ AFF U23 Championship គឺជា​ព្រឹត្តិការណ៍​ប្រចាំ​តំបន់​មួយ ដែល​បាន​បង្កើតឡើងកាលពី​ឆ្នាំ​២០០៥ នៅ​ប្រទេស​ថៃ។ យោង​តាម​សហព័ន្ធ​កីឡាបាល់ទាត់​អាស៊ីអាគ្នេយ៍ សមាជិក​ព្រឹត្តិការណ៍​មាន ១២ប្រទេសរួមមាន​កម្ពុជា ថៃ វៀតណាម ឡាវ ព្រុយ​ណេ ហ្វីលីពីន សិង្ហ​បុរី ម៉ាឡេស៊ី ឥណ្ឌូនេស៊ី មី​យ៉ាន់​ម៉ា ទី​ម័​រ​ខាងកើត និង​អូស្ដ្រាលី​ផងដែរ ។ ប៉ុន្តែ​បេក្ខភាព​ក្រុម ក៏ដូចជា​កាល​វិភា​គ​ប្រ​កួត​ផ្លូវការនៅ​មិនទាន់​កំណត់​នោះ​ទេ៕

​អត្ថបទ៖ លី ឈុន​ឡា