ប្រធានាធិបតីបណ្តោះអាសន្នរបស់ប្រទេសស៊ីរី លោក Ahmed Al-Sharaa កាលពីថ្ងៃអង្គារ បានអំពាវនាវដល់សហគមន៍អន្តរជាតិ ដាក់សម្ពាធលើអ៊ីស្រាអែល ឲ្យដកកងទ័ពរបស់ខ្លួនចេញពីភាគខាងត្បូង «ជាបន្ទាន់» ខណៈដែលលោក បានចូលរួមកិច្ចប្រជុំកំពូលអារ៉ាប់ជាលើកដំបូង ចាប់តាំងពីឡើងកាន់តំណែង។

ចាប់តាំងពីក្រុមឥស្លាមនិយម Hayat Tahrir Al-Sham (HTS) របស់លោក Sharaa បានដឹកនាំការវាយលុក ដែលបានផ្តួលរំលំប្រធានាធិបតីស៊ីរីកាន់អំណាចយូរ គឺលោក បាសា អាល់អាសាដ ( Bashar al-Assad) កាលពីថ្ងៃទី ០៨ ខែធ្នូ អ៊ីស្រាអែលបានដាក់ពង្រាយកងទ័ព ទៅកាន់តំបន់ទ្រនាប់ដែលល្បាតដោយអង្គការសហប្រជាជាតិ ដែលបានខណ្ឌចែករវាងកងកម្លាំងអ៊ីស្រាអែល និងស៊ីរី នៅលើតំបន់យុទ្ធសាស្ត្រ Golan Heights ចាប់តាំងពីឆ្នាំ ១៩៧៤។

អ៊ីស្រាអែលបានគ្រប់គ្រងភាគច្រើននៃតំបន់ខ្ពង់រាប Golan Heights ចាប់តាំងពីឆ្នាំ ១៩៦៧ ហើយក្រោយមក បានដាក់តំបន់នេះជាឧបសម្ព័ន្ធដែលដោយភ្ជាប់ទៅភាគអាគ្នេយ៍នៃប្រទេសស៊ីរី ជាការសម្រេចមួយ ដែលមិនត្រូវបានទទួលស្គាល់ដោយអង្គការសហប្រជាជាតិ។

ក្រៅពីការលុកលុយដោយថ្មើរជើង កងកម្លាំងអ៊ីស្រាអែល ក៏បានធ្វើការវាយប្រហារតាមអាកាសម្តងហើយម្តងទៀតប្រឆាំងនឹងទីតាំងយោធាស៊ីរី ក្នុងរយៈពេលប៉ុន្មានថ្ងៃថ្មីៗនេះ។

លោក Sharaa បានថ្លែងប្រាប់កិច្ចប្រជុំកំពូលនៃមេដឹកនាំអារ៉ាប់ នៅទីក្រុងគែរថា៖«យើងជំរុញសហគមន៍អន្តរជាតិឲ្យរក្សាការប្តេជ្ញាចិត្តផ្នែកច្បាប់ និងផ្នែកសីលធម៌របស់ខ្លួន ដោយគាំទ្រសិទ្ធិរបស់ស៊ីរី និងដាក់សម្ពាធឲ្យអ៊ីស្រាអែលដកកងទ័ព ចេញពីភាគខាងត្បូងប្រទេសស៊ីរី ជាបន្ទាន់»។