ប្រធានាធិបតីលីបង់លោក Joseph Aoun កាលពីថ្ងៃអង្គារ បានពិភាក្សាជាមួយសមភាគីស៊ីរី លោក Ahmed Al-Sharaa នៅក្រៅកិច្ចប្រជុំកំពូលអារ៉ាប់ នៅទីក្រុងគែរ ក្នុងអំឡុងពេលដែលអ្នកទាំងពីរ បានព្រមព្រៀងគ្នាលើឧប្បត្តិហេតុ នៅតាមបណ្តោយព្រំដែនរួមគ្នារបស់ពួកគេ។

ប្រទេសស៊ីរីមានព្រំប្រទល់ប្រវែង ៣៣០ គីឡូម៉ែត្រ (២០៥ម៉ាយ) ជាមួយប្រទេសលីបង់ ដោយគ្មានការកំណត់ជាផ្លូវការ នៅតាមចំណុចផ្សេងៗ ដែលធ្វើឲ្យវាមានច្រកតូចៗជាច្រើន ហើយងាយនឹងមានការរត់   ពន្ធ។

ដោយការទម្លាក់លោក អាសាដ ពីតំណែង ក្នុងខែធ្នូ បន្ទាប់ពីការគ្រប់គ្រងអស់រយៈពេល ៥ទសវត្សរ៍របស់គ្រួសាររបស់ខ្លួន ប្រទេសស៊ីរីនិងលីបង់ដែលមានប្រវត្តិជម្លោះនិងអំពើហិង្សាដ៏ជូរចត់ បានចាប់ផ្តើមរៀប   ចំការកសាងប្រទេសឡើងវិញ រៀងៗខ្លួន។ 

ការឈ្នះការបោះឆ្នោតនៅថ្ងៃទី ០៩ ខែមករា របស់លោក Aoun បានបំពេញតំណែងប្រធានាធិបតីដែលទំនេររយៈពេល ២ឆ្នាំ នៅក្នុងប្រទេសលីបង់ បន្ទាប់ពីក្រុមហេសបូឡា ដែលជាកម្លាំងដ៏មានឥទ្ធិពលរបស់ប្រទេសនេះ បានទទួលរងការខាតបង់យ៉ាងធ្ងន់ធ្ងរ នៅក្នុងសង្គ្រាមជាមួយអ៊ីស្រាអែល។

ក្រុមហេសបូឡា ក៏បានបាត់បង់ផ្លូវផ្គត់ផ្គង់ដ៏សំខាន់របស់ខ្លួនពីអ៊ីរ៉ង់ដែលគាំទ្រខ្លួន តាមរយៈប្រទេសស៊ីរី បន្ទាប់ពីក្រុមឧទ្ទាម Hayat Tahrir Al-Sham (HTS) របស់លោក Sharaa បានបណ្តេញលោក អាសាដ ចេញពីអំណាច ហើយបន្ទាប់មក លោក Sharaa បានក្លាយជាប្រធានាធិបតីបណ្តោះអាសន្នរបស់ប្រទេសស៊ីរី។ 

ការិយាល័យប្រធានាធិបតីលីបង់ បាននិយាយនៅលើបណ្តាញសង្គម X កាលពីថ្ងៃអង្គារថា៖«លោកប្រធានាធិបតី Aoun និងប្រធានាធិបតីស៊ីរីលោក Sharaa បានដោះស្រាយបញ្ហាជាច្រើន» ដោយបន្ថែមថា ពួកគេបានយល់ព្រមលើ«តម្រូវការ ដើម្បីគ្រប់គ្រងព្រំដែនរវាងប្រទេសទាំងពីរ»។