ប្រធានាធិបតីអាមេរិក លោក Donald Trump កាលពីថ្ងៃអង្គារ (ទី៤ ខែមីនា) បាននិយាយថា សេដ្ឋកិច្ចអាមេរិក នឹងជួបប្រទះ «បញ្ហា» ខ្លះៗ ដោយសារការដំឡើងពន្ធ ប៉ុន្តែលោកបានពោលសរសើរវិធានការនេះថា ជាឧបករណ៍ដែលនឹងជួយឲ្យឧស្សាហកម្មក្នុងស្រុករីកចម្រើន។

នៅក្នុងសុន្ទរកថាដំបូងរបស់លោកទៅកាន់សម័យប្រជុំរួមរបស់សភា គិតចាប់តាំងពីបានវិលត្រលប់ទៅកាន់សេតវិមានវិញ លោក Trump បានលើកឡើងថា៖ «ការដំឡើងពន្ធ មិនមែនត្រឹមតែការពារការងារអាមេរិកប៉ុណ្ណោះទេ។ ប៉ុន្តែវិធានការនេះ មានពាក់ព័ន្ធដល់ការការពារព្រលឹងជាតិរបស់យើង។ វានឹងមានការរំខានបន្តិចបន្តួចតែប៉ុណ្ណោះ ប៉ុន្តែយើងមិនអីទេ។ វានឹងមិនមានបញ្ហាអ្វីច្រើនឡើយ»។

លោក Trump បានព្រមានថា អ្នកដែលមិនបានផលិតផលិតផលរបស់ពួកគេ នៅសហរដ្ឋអាមេរិក នឹងត្រូវបង់ពន្ធ «ក្នុងករណីខ្លះ ត្រូវបង់ខ្ពស់ខ្លាំងទៀតផង»។ ជាមួយគ្នានេះ លោកក៏បានដាក់គោលដៅទៅលើសហភាពអឺរ៉ុប និងបណ្តាប្រទេសនានា ក្នុងនោះរួមទាំងប្រទេសកាណាដា ប្រេស៊ីល ឥណ្ឌា ម៉ិកស៊ិក និងកូរ៉េខាងត្បូងផងដែរ ជុំវិញអ្វីដែលលោកហៅថា ការអនុវត្តមិនយុត្តិធម៌។

គួរបញ្ជាក់ថា លោក Trump បានចាត់វិធានការយ៉ាងឆាប់រហ័ស ដើម្បីដំឡើងពន្ធ ដែលនឹងប៉ះពាល់ដល់ទំនិញតម្លៃប្រមាណជា ១,៤សែនកោដិដុល្លារ សម្រាប់ការនាំចូលទៅសហរដ្ឋអាមេរិក ពីប្រទេសកាណាដា ម៉ិកស៊ិក និងចិន ដោយមានគម្រោងបន្ថែមពន្ធទៀត។ ចំណាត់ការនេះបានធ្វើឲ្យមានភាពរំជើបរំជួលដល់ទីផ្សារហិរញ្ញវត្ថុ ដោយនាំឲ្យមានការសងសឹកយ៉ាងឆាប់រហ័ស ក្នុងនោះរួមទាំងការដំឡើងពន្ធតបត និងវិធានការផ្សេងៗទៀត៕